Usain Bolt, aborigjenët do ta kishin turpëruar

Usain Bolt është njeriu më i shpejtë në botë? Cilido prej aborigjenëve prehistorikë do ta kishte turpëruar në një garë shpejtësie. Rekordi botëror i hedhjes së larti është regjistruar afro një shekull më parë: pjesa më e madhe e të rinjve Tutsë në Ruandë gjatë ceremonive kërcenin 2,5 metra ose më shumë, ndërsa primati i tanishëm mbahet nga Sotomajor me 2,45 metra. Këto dhe shembuj të tjerë mund të gjenden në librin e antropologut australian, Pitër MekAlister, që titullohet "Manthropology". Aty autori jep sistematikisht të dhëna se specia jonë nuk ka përparuar në aspektin fiziko-atletik. "Jemi grupi më për të ardhur keq i meshkujve në historinë e homosapiensit që ka vënë këmbë mbi tokë". Përfundimet rreth shpejtësisë së aborigjenëve australianë që kanë jetuar 20 mijë vjet më parë bazohen në terrenin e fosilizuar të vendit të tij. Nga gjurmët e gjashtë burrave që ndiqnin prenë e tyre u zbulua se ata vraponin me 37 km në orë. Bolt gjatë rekordit botëror në Berlin kaloi shpejtësinë 44 km në orë: por për studiuesin kjo u arrit në terrenin ideal dhe me ndihmën e këpucëve të atletikës. MekAlister hedh hipotezën se aborigjeni, i cili vraponte zbathur dhe në një terren të vështirë, mund të arrinte edhe shpejtësinë 45 km në orë dhe nuk mund të quhej më i shpejti i fisit të tij. Shkencëtari bën edhe krahasime të tjera: sipas tij, në kohët e lashta njerëzit hidhnin shtiza të rënda druri deri në 110 metra largësi, ndërsa rekordi i ditëve të sotme është 98,48 metra. Për më tepër, legjionet romane përshkruanin një maratonë e gjysmë në ditë (mbi 60 km distancë) me pajisje që peshonin sa gjysma e tyre.