V E N D I M PËR KRIJIMIN E QENDRËS KOMBËTARE PËR APLIKIMET ENERGJETIKE

V E N D I M 

PËR 

KRIJIMIN E QENDRËS KOMBËTARE PËR APLIKIMET ENERGJETIKE

Në mbështetje të nenit 100 të Kushtetutës, të nenit 10, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, të neneve 2, pika 1, shkronja “ç”, pika 2, shkronjat “a” e “b”,  4, 13, 15, pikat 1 e 2, shkronja “a”, të ligjit nr.10081, datë 23.2.2009, “Për licencat, autorizimet dhe lejet në Republikën e Shqipërisë”, me propozimin e ministrit të Ekonomisë, Tregtisë dhe Energjetikës, Këshilli i Ministrave

V E N D O S I:

1.     Krijimin e Qendrës Kombëtare për Aplikimet Energjetike (në vijim QKAE), si institucion bashkërendues dhe lehtësues, për procedurat e marrjes së lejeve dhe/ose të autorizimeve  të nevojshme për ngritjen dhe funksionimin e të gjitha llojeve të projekteve, në fushën e energjisë elektrike.

2.     QKAE-ja është institucion publik qendror, buxhetor, me personalitet juridik, në varësi të ministrit, që mbulon fushën e ekonomisë.

3.     QKAE-ja e ka selinë në Tiranë.

4.     QKAE-ja financohet nga buxheti i shtetit.

5.     QKAE-ja ka këto funksione:

·         Lehtëson procesin e lëshimit të licencave, të lejeve, autorizimeve dhe akteve të tjera administrative, për ndjekjen e të gjitha llojeve të projekteve, në fushën e energjisë elektrike, nga të gjitha burimet e mundshme, nëpërmjet bashkërendimit të procedurave për dhënien e licencave, të autorizimeve apo lejeve nga institucionet a entet publike përkatëse;

·         Mbështet me analiza dhe sugjerime nismat e reja të reformës rregullatore, të cilat lidhen me funksionin parësor të kësaj qendre.

·         Jep mendime dhe bën oponencë për nisma, ligjore dhe nënligjore, për institucionet publike, që lidhen me funksionin parësor të kësaj qendre.

·         Informon dhe këshillon subjektet private për kriteret dhe procedurat për licencimin, lejimin apo autorizimin e projekteve në fushën e energjisë elektrike.

6.     QKAE-ja funksionon sipas modelit të “Qendrës me një ndalesë të vetme”.

7.     Veprimtaria e QKAE-së drejtohet nga drejtori i Përgjithshëm, i cili emërohet nga ministri, në përputhje me legjislacionin në fuqi.

8.     Titullari i QKAE-së lirohet nga detyra për shkaqet dhe sipas procedurave të parashikuara në pikën 1, të nenit 21, të ligjit nr.8549, datë 11.11.1999, “Statusi i nëpunësit civil”. Vendimi për lirimin e titullarit merret nga ministri përgjegjës për ekonominë.

9.     Për përzgjedhjen e nëpunësve të QKAE-së zbatohen procedurat e përcaktuara në ligjin nr.8549, datë 11.11.1999, “Statusi i nëpunësit civil”.

10.   Marrëdhëniet e punës të punonjësve të tjerë të QKAE-së që kryejnë detyra të karakterit mbështetës, rregullohen sipas Kodit të Punës dhe dispozitave të tjera, ligjore dhe nënligjore, të dala në mbështetje dhe në zbatim të tij.

11.   Zhvillimi i procedurave për rekrutimin e nëpunësve të QKAE-së, në fazën fillestare të krijimit, kryhet nga strukturat përkatëse të shërbimeve mbështetëse, të ministrisë përgjegjëse për ekonominë.

12.   Struktura dhe organika e QKAE-së miratohen nga Kryeministri.

13.   Numri i punonjësve të QKAE-së, me vendim të Këshillit të Ministrave, i shtohet numrit të përgjithshëm të Ministrisë së Ekonomisë, Tregtisë dhe Energjetikës.

14.   Buxheti i QKAE-së miratohet së bashku me buxhetin vjetor të Ministrisë së Ekonomisë, Tregtisë dhe Energjetikës, si zë i veçantë. Buxheti i QKAE-së, për periudhën në vazhdim, të vitit 2009, të përballohet nga fondet e Ministrisë së Ekonomisë, Tregtisë dhe Energjetikës.

15.   Deri në rekrutimin e stafit të nevojshëm, shërbimet e financës, të llogarisë dhe prokurimit të QKAE-së të kryhen nga Ministria e Ekonomisë, Tregtisë dhe Energjetikës.

16.   Qendra Kombëtare e Licencimit (QKL) dhe Agjencia Kombëtare e Shoqërisë së Informacionit (AKSHI), nën drejtimin e Ministrisë së Ekonomisë, Tregtisë dhe Energjetikës të evidentojnë ndryshimet e nevojshme të akteve, ligjore dhe nënligjore, në fuqi, për të mundësuar funksionimin e QKAE-së në ato fusha veprimtarie, të cilat nuk i janë nënshtruar zbatimit të ligjit nr.10081, datë 23.2.2009, “Për licencat, autorizimet dhe lejet në Republikën e Shqipërisë”, të ndryshuar.

17.   Deri në datën e hyrjes në fuqi të ndryshimeve të nevojshme ligjore sipas pikës 16, të këtij vendimi, QKAE-ja do të kryejë funksionet e saj, të përcaktuara në këtë vendim, për aq sa kjo lejohet nga legjislacioni në fuqi.

18.    Ngarkohen Ministria e Ekonomisë, Tregtisë dhe Energjetikës, Ministria e Financave dhe Departamenti i Administratës Publike për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

SALI  BERISHA