Van Gal kritikon FIFA-n: Është bërë një azil pleqsh!

Trajneri i Bajernit të Mynihut, Luis van Gal, bashkë me arbitrat e Bundesligës janë shprehur "pro" instalimit të teknologjisë në survejimin dhe gjykimin e ndeshjeve. Kjo mënyrë, sipas tyre është më efikase dhe e duhura për të përcaktuar saktësisht të vërtetën e golave apo episodeve të tjera gjatë një ndeshjeje. Në një intervistë të dhënë për të përditshmen gjermane "Kicker", trajneri holandez, Van Gal, ka kritikuar ashpër drejtuesit e institucionit më të lartë të futbollit, në veçanti kreun e saj, Sep Blater si dhe u ka kërkuar figurave të njohura të futbollit, si Franc Bekenbauerit dhe Johan Krojfit të angazhohen më shumë për këtë temë. Megjithëse, presidenti i FIFA-s, Blater, kishte deklaruar gjatë Botërorit të kaluar se do ta diskutojë këtë çështje, ai ka heshtur duke mos dhënë asnjë sqarim. "është e pabesueshme që institucioni më i lartë i futbollit të mos ketë asnjë reagim ndaj rregullatorëve të futbollit. Duhet të jenë vetë ata iniciatorët e kësaj nisme, për të përmirësuar shërbimet. Blateri ka dalë jashtë orbite, është vjetruar dhe komisioni i tij rregullator me të drejtë mund të quhet "kushtetuta e pleqve". E rëndësishme është që ata të reflektojnë, pasi përdorimi i mjeteve ndihmëse të teknologjisë do evoluojë çdo 'qelizë' të futbollit", ka nënvizuar trajneri i Bajernit të Mynihut, Luis van Gal, duke akuzuar edhe indikatorët e tjerë. "Si Bekenbauer ashtu dhe Krojf nuk duhet të qëndrojnë pasivë, përkundrazi, duhet të angazhohen më shumë, pasi vetëm ata mund të bëjnë që FIFA të reflektojë", përfundoi ai.