“Vatra”, Topit: Mos pengo hapjen e dosjeve
“Politika të angazhohet për zbatimin e ligjit”
“Krimet e komunizmit nuk mund të arkivohen”
Shqiptaro-amerikanët e shoqatës “Vatra” në SHBA përfshihen në çështjen e hapjes së dosjeve në Shqipëri, duke i dërguar një letër kryetarit të shtetit, Bamir Topi. Teksa z. Topi i kërkohet dekretimi sa më shpejt i ligjit të lustracionit, politikës së të dy krahëve u bëjnë thirrje që të zbatojnë atë dhe mos të arkivojnë krimet e komunizmit. Federata panshqiptare "Vatra", në Nju Jork, kërkoi dje që Presidenti i Republikës, Bamir Topi, të plotësojë kompetencat e tij kushtetuese dhe të dekretojë ligjin e lustracionit, ndërkohë që klasa politike shqiptare në tërësi të angazhohet për zbatimin e këtij ligji. Përmes një letre drejtuar Presidentit të Republikës, kryetari i kësaj shoqate, Agim Karagjozi, shpreh mbështetjen për ligjin e lustracionit të aprovuar nga Parlamenti shqiptar në përfundim të sesionit të vjeshtës. "Ky ligj është i domosdoshëm për vendosjen e të drejtës dhe dinjitetit të njeriut shqiptar. Ndarja e qartë dhe e prerë me të shkuarën diktatoriale komuniste është kusht i parë për zhvillimin e një shoqërie demokratike. Shqipëria në këtë rrugë është e vonuar dhe nuk mund të pritet më gjatë", - thuhet në këtë letër. Sipas kryetarit të shoqatës "Vatra": "Është e dhimbshme dhe e papranueshme që të shohësh në nivele të larta të jetës politike dhe publike shqiptare, në Parlament dhe institucione të rëndësishme shtetërore, individë që kanë lyer duart me krime politike dhe i kanë shërbyer me zell makinës kriminale të diktatorit Hoxha. Është cinike të thuhet se ato krime duhet të arkivohen, pa marrë asnjë qëndrim ndaj aktorëve të tyre. Dhe është e pafalshme që edhe sot, pas 18 vitesh pluralizmi e demokracie, ata individë nuk shprehin asnjë lloj pendese publike, përkundrazi, krenohen me arrogancë", - vijon më tej z. Karagjozi në letrën e tij. Federata panshqiptare e Amerikës, "Vatra", është themeluar në 28 prill 1912 dhe gjatë gjithë aktivitetit të saj, përgjatë një shekulli, ajo ka luajtur një rol të rëndësishëm në mbrojtje të çështjes kombëtare.