Vdekja e 17-vjeçares,vrasje apo vetëvrasje!

01/04/2005  Gramsh - Mungesa e provave të vetëhelmimit, e kanë vënë në dilemë policinë për të përcaktuar nëse Sonila Mema, 17 vjeçe, është vetëhelmuar, apo një arsye tjetër ka sjellë vdekjen e saj. Mjekët thanë se vajza ka vdekur nga helmimi, por pa caktuar llojin e tij. Policia në njoftimin zyrtar e ka përcaktuar si vetëhelmim vdekjen e 17-vjeçares. Për këtë rast mësohet se, kanë nisur hetimet për të zbardhur shkakun e vdekjes, ndërsa familjarët kërkuan të marrin trupin e pajetë për të kryer ritet e fundit. Ndërkohë nuk kanë përfunduar ende analizat e ndërmarra nga spitali i Gramshit për të përcaktuar edhe llojin e helmit vdekjeprurës. Mosgjetja e provave, që vërtetojnë vetëhelmimin, ka rritur dyshimet e një vrasjeje të qëllimshme, por kjo mbetet ende një mundësi deri në saktësimin e llojit të helmit dhe veprimin e tij te 17-vjeçarja. Ajo i dha fund jetës, dhe, sipas të afërmve, kjo pas ndarjes me të dashurin. Vajza nuk kishte shkuar në shkollë dhe gjatë 3 orëve që ka qëndruar e vetme në shtëpi ka pastruar të gjithë shtëpinë, duke rregulluar edhe bagëtitë. Ajo ishte mbyllur në dhomë dhe aty kishte gëlltitur edhe një sasi të konsiderueshme helmi.