Vdekja e grekut nga mbidoza, ndalohet 19-vjeçari shqiptar

 

SARANDE - Vdekja e të riut grek, Vasilios Gazelos, në kushtet e përdorimit të mbidozës së drogës, ka çuar në pranga një të ri nga fshati Markat. Sipas burimeve nga Komisariati i Policisë së Sarandës, paraditen e djeshme është bërë arrestimi i Arben Isufit, 19 vjeç, i akuzuar se ka penguar hetimet për zbardhjen e së vërtetës. Isufi është banor i fshatit Markat, rreth 8 km larg fshatit Janjar, ku edhe ka ndodhur ngjarja. Burimet zyrtare pohojnë se 19-vjeçari ka qenë në dijeni të gjithçkaje që ka ndodhur në fshatin Janjar 3 ditë më parë. Ai mësohet të ketë pasur dijeni se grupi i djemve, mes të cilëve edhe 28-vjeçari Gazelos, kishte konsumuar lëndë narkotike. Gjithashtu nga ana e policisë dyshohet se i riu ka pasur dijeni edhe për transportimin e kufomës, nga vendi ku ai edhe ka vdekur, pra në një banesë të këtij fshati, për në vendin ku u gjet kufoma, në afërsi të piramidës 54. Isufi rezulton të ketë lajmëruar policinë greke në lidhje me vdekjen e shtetasit helen, ndonëse vetë ai nuk ka pranuar asnjë nga këto fakte. Pas arrestimit të tij janë në kërkim dhe tre persona të tjerë, një grek dhe dy shqiptarë.                                                sh.d