Vdes në kabinë elektricisti 50- vjeçar

TIRANË- Një elektricist ka gjetur vdekjen mëngjesin e djeshëm teksa tentonte të rregullonte një defekt në kabinën elektrike në rrugën “Myslym Keta” në Tiranë. Nazmi Liçi, 50-vjeç, është gjetur në gjendje të rëndë nga kalimtarët e rastit, të cilët janë habitur kur kanë dëgjuar zhurmë brenda kabinës. Ata e transportuan menjëherë në spitalin “Nënë Tereza” por 50-vjeçari ndërroi jetë sapo mbërriti në duart e mjekëve. Oficerët e policisë mbërritën në kabinën elektrike për të bërë këqyrjen e provave. Burimet policore thanë se aksidentalisht elektricisti ka pasur kontakt me energjinë elektrike gjë e cila i ka shkaktuar edhe vdekjen. “Nga grupi hetimor u arrit në përfundimin se shkaku i vdekjes dyshohet të jetë nga kontakti me energjinë elektrike, pasi viktima ka qenë duke punuar në kabinën elektrike të zonës, i cili punonte si elektricist”,- thanë burimet zyrtare të policisë së Tiranës.

-------------------------------------------Arrestohet prostituta 20- vjeçare

TIRANË- Policia e kryeqytetit ka arrestuar ditën e djeshme 20-vjeçaren S. K, lindur në Laç e banuese në Tiranë, pasi ajo është kapur në flagrancë duke prostituuar. Burime nga policia thanë se arrestimi i vajzës u krye pasi ajo u kap në rrugën “Karl Gega” në një hotel duke kryer marrëdhënie seksuale me një shtetas kundrejt shumës së parave prej pesë mijë lekësh. Agjentët e antitrafiqeve kishin siguruar informacione në rrugë operative për “aktivitetin” e Kalthit, ndaj dhe e kanë mbajtur nën vëzhgim atë prej disa ditësh. Agjentët zbuluan dhe vendin ku 20-vjeçarja prostituonte duke kryer dhe ndërhyrjen. Ditën e djeshme policia ka kapur Kalthin teksa prostituonte me një klient. Ky i fundit u mor në pyetje nga policia dhe pasi deklaroi se kishte paguar për të kryer marrëdhënie seksuale më 20-vjeçaren u la i lirë, ndërsa ndaj vajzës u mor masa e arrestit për veprën penale të “ushtrimit të prostitucionit”.