Veprimet që sfidojnë sundimin e ligjit të dënohen

Përfaqësuesi Civil Ndërkombëtar (ICR), Piter Feith, duke komentuar zhvillimet e fundit në veri të Kosovës, ka thënë se çdokush duhet të kundërshtojë dhunën dhe frikësimin dhe të përkrahë zgjidhjen e situatës së tanishme në Kosovë me mjete paqësore.

Përmes një deklarate për media të enjten, Feith ka theksuar se çdo akt i dhunës dhe frikësimit nga cilado palë është i papranueshëm dhe si i tillë duhet të kundërshtohet.

“Askush nuk do të fitojë ndonjë përparësi përmes veprimeve të tilla. Të shtënat fatale kundër një polici dhe veprimet e tjera që sfidojnë sundimin e ligjit duhet të dënohen në mënyrën më të fuqishme”, është shprehur ai.

Feith i ka bërë thirrje popullit të Kosovës që të promovojë qetësinë dhe të tregohet i përmbajtur. Ai ka thënë se duhet të ketë bashkëpunim të plotë me EULEX-in dhe KFOR-in dhe me Policinë e Kosovës.

“Është shumë me rëndësi që situata e tanishme të zgjidhet në mënyrë paqësore përmes diskutimeve dhe negociatave, duke përfshirë edhe dialogun e lehtësuar nga BE-ja. Pastaj fokusi do të vihet në mënyrë të duhur në interesat afatgjate të qytetarëve të Kosovës”, ka thënë Përfaqësuesi Civil Ndërkombëtar (ICR), Piter Feith.