Veshkat, brenda marsit transplanti i dytë në Itali nga mjekët shqiptarë

• Një tjetër transplant veshke do të kryhet nga mjekët shqiptarë në muajin mars. Këtë bën me dije Bardh Spahia, drejtori i Përgjithshëm në Ministrinë e Shëndetësisë, njëkohësisht edhe pjesë e stafit të kirurgëve që realizuan operacionin.“Në sajë të  programit INTERREG III, pas transplantit të parë, të cilit iu nënshtrua një pacient 23-vjeçar nga Kamza, është vendosur që në datën 3 mars të niset për në Bari (Itali) çifti i dytë i pacientëve, ku dhe do të kryejnë analizat e kompatibilitetit”, sqaroi Spahia. Ai shtoi gjithashtu se, projekti ka ecur më së miri deri tani, duke hedhur një hap përpara në plotësimin e standardeve të Bashkimit Evropian në shëndetësinë shqiptare. “Ky projekt, i cili përkon edhe me objektivat e qeverisë, është cilësuar edhe nga pala italiane si një nga më të suksesshmit i vënë në jetë në vendin tonë. E gjitha kjo është në shërbim të pacientëve shqiptarë, të cilët shumë shpejt do të kenë mundësi të kryejnë transplantin në vendin e tyre”, theksoi Saphia. Sipas tij, suksesi më i madh i këtij projekti qëndron përtej faktit të kryerjes së një procedure kirurgjikale. Arritjet kryesore të tij lidhen kryesisht në rritjen e standardeve të strukturave shëndetësore shqiptare, si dhe trajnimit të stafit mjekësor. “Jemi optimistë për zhvendosjen e shpejtë të këtyre ndërhyrjeve në sallat operative shqiptare. Tashmë në spitalin “Nënë Tereza” Laboratori Imunologjik është kompletuar, ndërsa salla operative po vjen drejt përfundimit”, tha ai.