Vidhet dyqani 30 metra larg policisë

Biznesi privat i një funksionari të kompanisë "Albpetrol" sh.a. është bastisur gjatë natës, duke gdhirë dita e djeshme. Burime policore njoftuan se dyqani që shërbente edhe si agjenci turistike dhe agjenci e transfertave të parave, në pronësi të shtetasit Vladimir Zenelaj është vjedhur gjatë natës. Aktiviteti në fjalë ndodhet në katin e parë të ish-shtëpisë së oficerëve, vetëm pak metra larg Komisariatit të Policisë së Fierit. Hajdutët kanë hyrë nga ana e pasme e dyqanit dhe kanë arritur të vjedhin para, karta telefoni dhe sende të tjera që shiteshin në dyqan, duke shkaktuar një dëm që llogaritet në disa milionë lekë.