Vjenë, mbahet konferenca “Kosova në BE”
Në konferencën në fjalë ishin të pranishëm edhe katër anëtarë të Parlamentit Evropian: Ernst Strasser (Austri), Indrek Tarand (Estoni) si dhe Mariya Nedelcheva e Emil Stefanov Stoyanov (Bullgari). Në hapje të konferencës, Ambasadori i Republikës së Kosovës në Austri, Sabri Kiqmari paraqiti zhvillimet dhe angazhimet e qeverisë së Kosovës në aspektin e integrimeve evropiane. Ndërkaq, eurodeputeti Ernst Strasser theksoi përkushtimin e Parlamentit Europian lidhur me gjetjen e mënyrave të përfshirjes së Kosovës në procesin e liberalizimit të vizave. Ai po ashtu deklaroi se pret që integrimi i tërë regjionit në BE-së të përfundojë brenda 10 viteve të ardhshme. Edhe folësit e tjerë nënvizuan rëndësinë e madhe që Kosova ka si faktor stabiliteti në Ballkanin Perëndimor. Në takim u diskutuan edhe çështje të tjera me rëndësi për temën në fjalë, ku me diskutimet e tyre kontribuuan edhe pjesëmarrësit tjerë. Në konferencën “Kosova dhe BE” morën pjesë kryesisht përfaqësues të korit diplomatik nga SHBA, Japonia, Turqia, etj si dhe shumë afaristë austriakë.