“Vlerësojmë rolin e Shqipërisë në Ballkan”

Shqipëria nënshkruan me BE-në marrëveshjen për menaxhimin e krizave

Shqipëria ka nënshkruar me Bashkimin Europian marrëveshjen për pjesëmarrjen në misionet e BE-së për menaxhimin e krizave. Përveç prezencës në operacionet civile të Bashkimit Europian si ai i Bosnjës apo Çad, kjo marrëveshje, do ti lejojë Shqipërisë të marrë gjithashtu pjesë në operacionet ushtarake të BE-së. Marrëveshja konsiderohet si një hap i mëtejshëm në forcimin e fushës së sigurisë midis Shqipërisë dhe BE-së, siç e cilëson edhe drejtori i përgjithshëm i aksionit të jashtëm të BE-së, Pierre Vimont.
“Me këtë marrëveshje kornizë bëhet e mundur që Shqipëria të marrë pjesë në operacionet e ardhshme ushtarake apo misione civile të Bashkimit Europian. Kjo përbën përfundimisht një hap përpara për një bashkëpunim më të strukturuar në fushën e sigurisë midis BE-së dhe Shqipërisë. Kjo do të mundësojë një përfshirje të shpejtë të Shqipërisë në operacionet e menaxhimit të krizave”, deklaroi Vimont
Bashkimi Europian vlerëson veçanërisht rolin e Shqipërisë në rajon.
Drejtori i përgjithshëm i aksionit të jashtëm të BE-së, Pierre Vimont shprehet se, “ne e kemi vlerësuar rolin e Shqipërisë në rajonin e Ballkanit në të shkuarën dhe vazhdojmë ta bëjmë këtë. Zhvillimet në rajonin e Ballkanit por edhe në të gjithë botën kërkojnë më shumë se kurrë që Bashkimi Europian të bashkëpunojë më ngushtë me partnerët e saj si Shqipëria në misionet e sigurisë dhe të politikës së jashtme të BE-së”.
Marrëveshja e nënshkruar për menaxhimin e krizave do të bëjë të mundur që Shqipëria të aktivizohet së bashku me shtetet anëtare të Bashkimit Europian për menaxhimin e krizave në pjesë të ndryshme të globit.