Vlorë, e përplas makina në trotuar, vdes kalimtari

Ende pa u përuruar rikonstruksioni i rrugës së shumëpërfolur Transballkanike në qytetin e Vlorës, shënohet viktima e parë. Një shtetas rreth 65 vjeç, ende i paidentifikuar, ka humbur jetën, teksa ka tentuar të kalojë këtë rrugë pranë stacionit të trenit. Ka qenë ora rreth 9:00 e mëngjesit të djeshëm, kur një makinë e tonazhit të rëndë tip triler, ka qenë duke kaluar në këtë rrugë në drejtim të portit të Skelës. Pikërisht në kryqëzimin e stacionit të trenit, përpara tij ka dalë 65- vjeçari. Ka qenë drejtuesi i makinës, 41- vjeçari Jetnor Pasha nga qyteti i Patosit, që ka tentuar të frenojë dhe të shmangë aksidentin, por ka qenë e pamundur sepse distanca midis tyre ka qenë e vogël, ndërkohë që rruga ishte bërë edhe e rrëshqitshme për shkak të një shiu të imtë që sapo kishte nisur. Në këto kushte, makina e ka përplasur 65- vjeçarin në trotuar, duke i shkaktuar vdekjen e menjëhershme. Në vendngjarje kanë mbërritur menjëherë uniformat blu të sektorit të qarkullimit rrugor për të bërë ekspertizën, ndërkohë që makina me targa FR 12 49 C ka bllokuar për minuta të tërë kalimin e mjeteve të tjera në këtë segment. Kjo rrugë edhe herë të tjera ka qenë skenë e aksidenteve të tilla midis mjeteve të ndryshme, por edhe ndaj kalimtarëve, megjithëse pa pasoja vdekjeje. Ajo është bërë shumë e rrezikshme për kalimtarët që kërkojnë të kalojnë nga njëra anë e saj në tjetrën, ndërkohë që makinat kalojnë pa asnjë zbatim të rregullave të qarkullimit. Duke qenë se ajo ende nuk ka përfunduar, është edhe jashtë kontrollit të policëve rrugor.