Vlorë, veteranë dhe ish ushtarakë protestojnë para prefekturës

Rreth 500 veteranë të luftës, ish oficerë në lirim, pensionistë dhe pjesëtarë të familjeve të dëshmorëve, kanë protestuar paraditen e djeshme përpara godinës së prefekturës. Në tekstin e protestës që është lexuar, ashtu edhe nga deklarimet që kanë bërë, tubuesit kanë bashkuar zërin e tyre për ti bërë apel qeverisë, që të mos luajë me këto kategori të shoqërisë, që kanë sakrifikuar për këtë vend. Veteranët e LANCL dhe pjesëtarët e familjeve të dëshmorëve, ushtarakët në pension dhe lirim, sindikata e pensionistëve kanë protestuar për shkeljen e të drejtave të miratuara me ligj për: Vendimi i Kuvendit të Shqipërisë  nr. 7874 datë 17.11. 1994 dhe nr. 7669, 20.01. 1993 Veteranët e luftës kundër pushtuesve nazifashistë të popullit shqiptarë dhe invalidët e luftës të përjashtohen nga taksat direkte. Sipas tyre, në kundërshtim me shkeljet flagrante, pa abroguar ligjet e mësipërme, po detyrohen të paguajnë taksën e TV, të pastrimit dhe të banesës. Sipas kryetarit të Komitetit të Veteranëve të Luftës z. Muharrem Veshi, veprime të tilla përbëjnë shpërdorim detyre, shkelje të drejtave të njeriut nga ana e vetë qeverisë, që i ka miratuar ato ligje. Flagrante e konsiderojnë edhe tkurrjen padrejtësisht të përfitimit të shpërblimit, për familjet e dëshmorëve dhe bllokimin e kërkesave të paraqitura dhe të miratuara nga organet e ngarkuara. Shumë veteranëve të luftës, u është njohur statusi me vendim gjyqësor, por ato nuk po zbatohen padrejtësisht, duke u mohuar një të drejtë të njohur me vendim gjyqi dhe për bllokimin e kërkesave dhe të dokumenteve përkatëse të depozituara në komisionin përkatës pranë Ministrisë së Mbrojtjes. Për zvarritjen dhe moszbatimin e vendimit të marrë nga ana e gjykatës kushtetuese, për shpërblimin suplementar të ushtarakëve në pension dhe në lirim. Ata kërkojnë gjithashtu që përkrah pensionit të bëhet indeksimi i statusit të veteranëve dhe invalidëve të luftës mbi bazën e inflacionit, që për një kohë të gjatë u mohohet me pa të drejtë. Dhe së fundi ata kanë kërkuar që të miratohet statusi për moshën e tretë si dhe tu jepen falas kartat identitetit veteranëve dhe invalidëve të luftës. Në të kundërt ata kanë kërcënuar se nuk do të marrin pjesë në votime.