Vlorë, vëzhgimi: Dy të moshuar mbahen në polici padrejtësisht

• TIRANE – Të paraburgosurit mbahen në kundërshtim me ligjin në dhomat e ndalimit dhe shoqërimit të policisë së Vlorës.Lajmi vjen nga Komiteti Shqiptar i Helsinkit në Tiranë, një grup i të cilit ka monitoruar më datë 27 shkurt situatën e respektimit të të drejtave të njeriut në dhomat e ndalimit dhe të shoqërimit në komisariatin e Vlorës. Gjatë vëzhgimit ka rezultuar se 7 persona, ndaj të cilëve gjykata kishte caktuar masën “arrest në burg”, vazhdonin të mbaheshin në qelitë e policisë 5 deri në 15 ditë nga arrestimi. Dh.J., i dënuar në mungesë nga Gjykata e Vlorës, megjithëse duhej dërguar në burg, vazhdonte të mbahej në polici. KSHH pohoi se ligji përcakton se edhe pse arrestimi i të moshuarve duhet të jetë rast përjashtimor, grupi monitorues ka konstatuar se në qelitë e komisariatit gjendeshin dy të moshuar, H.Sh dhe M.Ç., përkatësisht 72 dhe 84 vjeç, të sëmurë dhe që kishin nevojë për trajtim mjekësor të veçantë. Mbajtja e tyre ishte tej afateve dhe në shkelje të rëndë të ligjit. Më tej, KSHH ka konstatuar se gjendja e dhomave të ndalimit dhe shoqërimit në polici në Vlorë ishte mjaft e rëndë. Në to mungonin totalisht pajisjet. Ndonëse ato funksionojnë për mbajtjen në një kohë shumë të shkurtër të personave që shoqërohen e ndalohen nga policia, përdorimi i tyre për të paraburgosur kishte sjellë mbipopullim, strese dhe pakënaqësi. Në to nuk krijohej as kushti më minimal, qoftë edhe për të shoqëruarit për verifikim të zakonshëm në polici.                 fa.ma.