Vodhën kabllo, tre të mitur nën hetim

Kabllot elektrike pre e hajdutëve në Rrethin e Krujës, tre të mitur nën hetim. Dy nxënës të shkollës 9-vjeçare të Thumanës, përkatësisht 16 dhe 13 vjeç janë proceduar penalisht, pasi dyshohet të jenë autorët e vjedhjes së një sasie kablloje në stacionin e pompave të ujit në Thumanë të Krujës. Nën akuzë janë vënë K.L., nga Thumana dhe A.S., nga Bushneshi. Vlera e kabllos së vjedhur nuk i kalon 10 mijë lekët e reja, po dëmi ka qenë i madh për komunitetin e zonës. Ndërkaq, blutë e Fushë-Krujës kanë ndaluar një 15-vjeçar nga ky qytet, pasi është dënuar nga gjykata e Tiranës me 5 muaj e 3 ditë për vjedhje në bashkëpunim. 15-vjeçari, në dhjetor të vitit të kaluar bashkë me dy shtetas të tjerë, Fatos Dukën dhe Lek Bibën, ishte kapur duke vjedhur një kabinë elektrike në Krujë.