Vojleboll Studenti fitoi 3-1 ne Durres ndeshjen e katert finale

Nëse do të vazhdojë kjo modë, atëherë Teuta duhet të jetë e lumtur pasi mund të shpallet kampione e Shqipërisë në volejboll për meshkuj. Veçse, deri sa të vijmë tek ndeshja e pestë dhe e fundit finale, le të tregojmë se ishte Studenti që fitoi 3-1 takimin e katërt, në pallatin e sportit “Ramazan Njala” në Durrës, duke barazuar shifrat në finalen e plej ofit, në 2-2.

Dy herë pati fituar Teuta në “Asllan Rusi” të kryeqytetit dhe po dy herë i është përgjigjur Studenti. Pra, tendenca është vetëm për fitore mike dhe takimi i fundit do të luhet në Tiranë. Titulli vendoset të hënën në orën 18:00 dhe durrsakët shpresojnë që drejtimi i erës të mos ndryshojë.

Në ndeshjen e katërt, Teuta fitoi setin e parë 25-17, por humbi të dytin me po këtë rezultat. Dy setet në vazhdim ishin dramë dhe durrsakët luftuan fort për ta fituar titullin që të premten mbrëma në qytetin e tyre. Nuk ia arritën.

Studenti fitoi setin e tretë 33-31 dhe të fundit, 25-23, pas një lufte të pafundme, ndërsa për fat të keq kjo ndeshje u luajt pa praninë e tifozëve për shkak të dënimit të fushës së Teutës.

Edhe sezonin e kaluar, titulli u vendos në ndeshjen e pestë në Tiranë dhe i takoi durrsakëve. Veçse, është e kotë të bësh parashikim se çdo të ndodhë të hënën.