Vushtrri, molotov dhe granatë në një automjet

Persona tani për tani të panjohur kanë hedhur koktej molotovi brenda automjetit të pronarit, A.A nga Vushtrria, ndërsa nën automjet është gjetur një granatë dore e pashpërthyer.

Ngjarja ka ndodhur të martën në mbrëmje në rrugën “Hakif Zejnullahu” në Vushtrri, përkatësisht në oborrin e shtëpisë së ankuesit.

Pas lajmërimit të rastit i menjëhershëm ka qenë edhe reagimi i ekipit të zjarrfikësve të Vushtrrisë, të cilët edhe kanë arritur të shuajë zjarrin në tërësi.

Dëme të vogla materiale i janë shkaktuar automjetit në brendi, ndërsa granata e dorës e prodhimit kinez që ishte pa siguresë nën automjet nuk ishte aktivizuar. Ajo është aktivizuar në mënyrë të kontrolluar në një vend të sigurt nga ekspertët e Policisë së Kosovës.

Zëdhënësi i policisë për rajonin e Mitrovicës, toger Besim Hoti ka thënë se rasti është regjistruar si vepër penale “shkaktim i rrezikut të përgjithshëm”, ndërsa hetuesit janë në fazën preliminare të hetimeve nuk kanë të identifikuar persona të dyshuar.