Xhaka, ylli i ri i Baselit
Granit Xhaka po shkëlqen këtë sezon me kampionin zviceran, Basel. Futbollisti i ri kosovar në Zvicër ka filluar ta marrë emër: ylli i ri i Baselit. Mesfushori i ri kosovar po e zëvendëson për mrekulli futbollistin Benjamin Huggel në mesfushën e ekipit zviceran.
Ueb faqja zvicerane 4-4-2.com ia ka kushtuar një tekst të veçantë 18 vjeçarit, i cili ka luajtur rregullisht në ndeshjet e fundit të Baselit, si në kampionatin zviceran, ashtu edhe në Europa League.
“Granit Xhaka e mbulon pozitën e tij në fushë si një veteran. Ai është i qetë me topin dhe ka nuhatje të mirë për ritmin e lojës. Xhaka është impresionues. Ai ka luajtur 420 minuta. Graniti ka një të ardhme të ndritshme përpara, nëse vazhdon me këtë ritëm”, shkruan kjo ueb faqe e cila nuk ndalet me kaq.
“Kampioni i botës me U17 të Zvicrës është mjaftueshëm i fuqishëm dhe ka një goditje të fortë. Goli i tij i jashtëzakonshëm në kualifikimet për Ligën e Kampionëve kundër Debrecen është i paharrueshëm”, vazhdon shkrimi.
Granit Xhaka së bashku me vëllanë e tij, Taulantin, ishin inkuadruar në ekipin e parë të Baselit vitin e kaluar nga ekipi i të rinjve. Në sezonin e tyre të parë, futbollistët në fjalë kanë pasur paraqitje të rralla, sidomos Taulanti.
Mirëpo, këtë sezon gjërat po shkojnë ndryshe. Graniti është bërë i pazëvendësueshëm në ndeshjet e fundit, duke e bindur shtabin teknik të Baselit me cilësitë që i posedon. Përpos Granit Xhakës, pjesë e rëndësishme e Baselit janë edhe Xherdan Shaqiri e Beg Ferati.