Zbardhet Shqiperia

Qyteti i Durrësit dhe të gjitha rrethinat e tij janë zbardhur nga flokët e dëborës që ka mbuluar gjithçka, duke shpërndarë habi dhe gëzim, po nuk kanë munguar problemet. Mëngjesi i djeshëm e gjeti qytetin bregdetar të mbushur me borën që mungonte prej 25 vjetësh. Përveç kënaqësive dhe frymëzimit artistik, bora ka shkaktuar mjaft probleme në qarkullimin e automjeteve.

Mëngjesi i 17 dhjetorit e ka zhvendosur dëborën nga rrethinat e Sarandës, nga Qafa e Muzinës e nga zona mbi Delvinë, brenda në qytetin bregdetar. Për disa minuta dëbora ka zbardhur çatitë e ndërtesave dhe soletat, por një tis bardhësie ka marrë i tërë peizazhi, çka është marrë si parathënie e mbarësisë së dëshiruar në vitin e ri që presim. Bora e fundit në Sarandë ra në vitin 2005.

Dëbora si rrallëherë ka zbardhur edhe Myzeqenë. Natën e së enjtes bora ka mbuluar rrethinat e Fierit dhe kodrat e Mallakastrës, ndërkohë që mëngjesin e së premtes flokët e dëborës kanë zbritur deri në qendrat e qyteteve Lushnjë dhe Fier. Rreth orës 10.00 bora ka arritur të krijojë një qilim të hollë edhe në Myzeqe, por pas 30 minutash ajo ka shkrirë.