Zbulohet grupi i hajdutëve grabitën me armë 5 banka

Një grup që dyshohet se kanë grabitur pesë banka në kryeqytet janë arrestuar nga policia, ndërkohë që një prej tyre ka pranuar të tregojë mekanizmin e vjedhjeve. Bëhet fjalë për tri vjedhje bankash të ndodhura gjatë këtij viti dhe dy të tjera, të ndodhura në vitin 2008. Drejtori i Policisë së Tiranës, Tonin Vocaj, ka dalë në një konferencë për shtyp, duke deklaruar se është finalizuar operacioni i koduar “Ombrella”, gjatë të cilit u arrestuan katër persona. Vocaj shpjegoi se në pranga përfunduan Fatjon Sami Deliu, 24 vjeç, i dënuar më parë për veprën penale të vjedhjes, Markeljano Izmir Nuro, 20 vjeç, Gerald Sefer Gordi, 20 vjeç dhe Ervis Dilaver Domi, 22 vjeç, të gjithë lindur e banues në Tiranë. Policia tha se veç arrestimit të tyre është shpallur në kërkim edhe Admir Zyko, i dyshuar si bashkautor në vjedhje me armë. “Ky operacion u finalizua pas një hetimi 9-mujor të kryer nga seksioni kundër vjedhjeve me dhunë dhe armë në Policinë e Tiranës, hetim i kryer nën drejtimin e Prokurorisë së Rrethit Gjyqësor Tiranë me përdorimin e gjerë të metodave speciale të hetimit. Nga hetimi rezulton e provuar se këta shtetas janë autorë të vjedhjes me armë të filialit të Bankës Kombëtare Tregtare, e ndodhur më datë 17 shkurt 2010 në rrugën “Myslym Shyri” në Tiranë”, deklaroi drejtori i Policisë së Tiranës. Sipas tij, këta persona janë të dyshuar dhe po zhvillohen hetime intensive për përfshirjen e tyre në bashkëpunim edhe me persona të tjerë në vjedhjet e katër bankave. Bëhet fjalë për dy vjedhje të tjera në Tiranë, që kanë ndodhur gjatë këtij viti. Një prej tyre është vjedhja e “Tirana Bank”, e ndodhur më datë 6 maj 2010, në rrugën dytësore në krah të autostradës Tiranë–Durrës, ndërsa tjetra ka ndodhur më 2 korrik 2010, kur është vjedhur filiali i “NBG Bank”, në rrugën dytësore të autostradës Tiranë-Durrës. Gjithashtu, ata dyshohen edhe për dy vjedhje në vitin 2008, përkatësisht atë të filialit NBG më 1 gusht 2008 në autostradën Tiranë–Durrës dhe vjedhjen e filialit të “Raiffaisen Bank”, ndodhur më 26 dhjetor 2008, në rrugën “Vangjel Noti” në Laprakë.