Zbulohet punishtja ku falsifikoheshin pijet alkoolike

Antikrimi ekonomik ka vënë në
pranga tre persona, pronarë
të një fabrike, ku falsifikoheshin
pije alkoolike. Operacioni për
kapjen e tyre është zhvilluar në Tiranë,
duke vendosur në pranga pronarin
e kësaj fabrike dhe dy punëtorë.
Burimet zyrtare të policisë bënë
të ditur se strukturat e posaçme të
hetimit të krimit kanë realizuar operacionin
blic të koduar "Konjaku i
lirë". Gjatë këtij operacioni u arrestuan
Qemal Xhafaj, 30 vjeç, Fatmir Koleci,
59 vjeç dhe Nazmi Kurti, 48 vjeç,
të gjithë banues në Tiranë. Në
kuadër të këtij operacioni, të sipërcituarit
u kapën në flagrancë përgjatë
transportimit të pijeve alkoolike
të falsifikuara, me një automjet me
targa të huaja. Gjatë kontrollit të kryer
në automjet, u sekuestruan në
cilësinë e provës materiale 16 kuti me
nga 12 shishe 0.75 litërshe me etiketa
konjak "Skënderbeu". Ndërkohë,
gjatë kontrollit të ushtruar në ambientet
e banesës së Fatmir Kolecit,
policia arriti të sekuestrojë një sasi të
madhe alkooli. Madje, Koleci u kap
duke mbushur shishe me pije të
ndryshme alkoolike. Pas një hetimi
disamujor, duke përdorur të gjitha
metodat speciale të hetimit, u
mundësua kapja në flagrancë e tre
shtetasve të mësipërm, të dyshuar
për konsumim të veprës penale të
"falsifikimit të vulave, stampave, ose
formularëve", "falsifikimit të letrave
me vlerë", "prodhimit dhe shitjes së
ushqimeve e të lëndëve të tjera të
rrezikshme për shëndetin" dhe "prodhimi
i kundërligjshëm i artikujve
dhe mallrave industrialë e ushqimorë".
Nga ana e seksionit kundër
krimit ekonomik u kryen veprimet e
para procedurale dhe materialet e
përpiluara do t‘i kalojnë për kompetencë
organit të Prokurorisë së Rrethit
Gjyqësor Tiranë, për hetime të
mëtejshme.