Zgjerim i shpimit te puseve te reja te naftes

Dy kompanitë më të mëdha ndërkombëtare që operojnë në sektorin e hidrokarbureve, Petromanas Energy dhe Shell të cilat kanë një rol të rëndësishëm në zhvillimin e këtij sektori në Shqipëri kanë programuar se në vitin 2012 do të zgjerojnë shpimin e puseve të reja të naftës. Në një takim të vecantë me ministrin e Ekonomisë, Tregtisë dhe Energjitikës Nasip Naco, dy eksponentët më të rëndësishëm të këtyre dy kompanive lidere në botë Shell dhe Petromanas Energy, z. Marcus Antonini dhe Glenn McNamara kanë paraqitur veprimtarinë më të fundit të dy kompanive në Shqipëri. Për përfaqësuesit më të lartë të këtyre kompanive ky vit do të jetë një vit zbulimi përsa i përket fushës së naftës.

Për vitin 2012 është planifikuar shpimi i pusit “Shpiragu 2” në afërsi të fshatit Mbjeshovë, komuna Sinjë në Berat, ku do të investohen rreth 50 milionë dollarë. Zbulimi i një fushe të re nafte në Shqipëri, sipas minstrit Naco, do të ishte një lajm i rëndësishëm jo vetëm për këto kompani, por edhe për gjithë shqiptarët. Zbulimi i naftës, në sektorin “Shpiragu 2”, gjatë vitit 2012, ka thënë ministri i METE, do të jetë një dhuratë mjaft domethënëse për shtetin shqiptar, edhe në 100 vjetorin e themelimit të tij.

 Kompania Petromanas Energy ka lidhur në vitin 2009 me shtetin shqiptar, një marrëveshje hidrokarbure për blloqet e kërkimit 2 dhe 3. Ndërkohë që pak muaj më parë  kjo kompani, i ka transferuar kompanisë lider në botë SHELL, 50 përqind të interesave në këtë marrëveshje hidrokarbure në vendin tonë .