Çelsi-Barcelona "pushtojnë" Botërorin

Edhe pse është shpallur rishtazi Kampion i Evropës, Interi i Masimo Moratit nuk është skuadra më e përfaqësuar në Kupën e Botës në Afrikën e Jugut. Vendin e parë e zënë çelsi i Londrës dhe Barcelona. Që të dyja këto ekipe kanë nga 14 lojtarë në këtë Botëror, të grumbulluar me kombëtaret respektive. Ndërkohë te Interi kanë ndikuar jo pak edhe zgjedhjet e trajnerëve, ku maft të kujtojmë se tekniku i Argjentinës, Diego Maradona refuzoi të grumbullonte dy ndër futbollistët më në formë, si Esteban Kambiaso dhe Havier Zaneti. Ndërkohë në vendin e dytë në këtë listë është Liverpuli, ekip ky që nuk ka bërë një sezon të mirë, por gjithsesi 12 nga lojtarët e vet janë pjesë e kombëtareve të tyre në Afrikë. Nga një lojtar më pak kanë Bajerni i Mynihut dhe Ajaksi i Amsterdamit, ndërsa vetëm nga 10 lojtarë kanë Inter, Arsenal, Panathinaikos dhe Real Madrid. Nga skuadrat legjendare që fatkeqësisht nuk kanë asnjë lojtar në Kupën e Botës është klubi argjentinas i River Plejt. Nga këta të fundit kanë dalë shumë talente të futbollit Botëror, por që në këtë Kupë të Botës Maradona nuk ka pranuar të përfillë asnjë lojtar të River.