"Drejtori" i vërtetë i burgut

BURREL - “Më lehtë se të dalësh nga burgu i Burrelit nuk mund të jetë tjetërkund”. Kështu deklaroi dje para trupi gjyqësor njëri nga të dënuarit me burg të përjetshëm, Fran Marashi, i cili u arratis pak ditë më parë nga burgu i Burrelit. Sipas tij, amullia në burg ishte e tillë, saqë “çelësin e kuzhinës dhe të magazinës së ushqimeve të të dënuarve e mbante prej kohësh Admir Tafili, vrasësi i Arben Zylyftarit, ish-drejtorit të policisë së qarkut të Shkodrës, i cili e dorëzonte atë gjatë natës”. Drejtues e vartës të burgut të sigurisë së lartë Burrel janë paraqitur dje para togave të zeza, ku do të përcaktohej masa e sigurisë për 8 nga të arrestuarit. 10 nga 12 të arrestuarit kanë mbetur në qeli, deri në zbardhjen e plotë të ngjarjes që çoi në arratisjen e 2 të burgosurve. Ajo që binte në sy mes të arrestuarve, ishin deklaratat e tyre, në përpjekje për të lënë qelitë dhe për t’u shpallur të pafajshëm.

Fakte tronditëse

Pavarësisht kësaj, të arratisurit dhe punonjësit e burgut sollën fakte të reja rreth ngjarjes së 5 prillit. Para prokurorit të çështjes, Sabri Kastrati dhe gjyqtarit Artan Çupi, i arratisuri Fran Marashi, i dënuar me burgim të përjetshëm, u ankua se nuk ishte mjekuar në kohën e duhur pas plagëve të marra gjatë largimit nga burgu. Po ashtu, Marashi u shpreh se kërkonte të kishte si avokat në këtë çështje Maks Haxhinë, mirëpo nuk i ishte dhënë mundësia për të komunikuar me të. “Bllokun me numrat e telefonit që kisha ma keni marrë ju”, tha Marashi. Pas kërkesës së tij për avokat, gjyqtari Çupi vendosi caktimin e një avokati kryesisht fillimisht. Edhe pse më pas mediat nuk u lejuan të qëndronin në sallë, për shkak të sekretit të hetimeve, mësohet se Marashi deklaroi se “më lehtë se nga burgu i Burrelit nuk mund të dalësh nga asnjë burg tjetër”. I pyetur rreth mënyrës së arratisjes, ai u shpreh se tentativa për të lënë qelitë e ftohta të burgut të Burrelit kishte nisur 5 muaj më parë. “Çdo ditë është menduar e punuar për t’u arratisur”, pohoi Marashi në prani të prokurorit, gjyqtarit dhe avokates së tij. Më tej ai shpalosi para trupit gjyqësor një detaj interesant për mënyrën sesi janë menaxhuar shërbimet në dhomat e izolimit dhe mjediset e brendshme. “Çelësin e kuzhinës dhe magazinës së ushqimeve të të dënuarve e mbante prej kohësh Admir Tafili, vrasësi i Arben Zylyftarit, ish-drejtorit të policisë së qarkut të Shkodrës. E merrte atë në orët e para të mëngjesit dhe e dorëzonte në orët e vona të natës”, tregoi ai. Nga ana e tyre, gardianët thanë se nuk janë instruktuar nga oficeri i rojës, nuk janë shoqëruar për në vendin e shërbimit ku bëhet dorëzimi i armës dhe çelësave, e se oficeri i rojës nëpërmjet kamerave të sigurisë i ka pasur të gjitha mundësitë të shihte qartë lëvizjet e të dënuarve dhe punonjësve të sigurisë.