Athinë, ekzekutohet shqiptari 20-vjeçar

Një shqiptar u ekzekutua mbrëmjen e së shtunës në qendër të Athinës. Viktima quhet Andi Zoto, 20 vjeç, nga Fieri. Policia, që mbërriti në vendngjarje, tha se viktima u qëllua me pistoletë në kokë. Sipas policisë, në rrugën "Aharnon 202", vetëm pak metra larg shtëpisë së tij. Nga burimet mësohet se viktima, bashkë me një mikun e tij po udhëtonin me motoçikletë, pikërisht mbi këtë aks rrugor, që është një ndër më të qarkulluarit në kryeqytetin helen. Në vendin e ekzekutimit u gjetën katër gëzhoja pistolete, ndërsa trupi i pajetë i emigrantit u gjet në mesin e rrugës, i mbuluar me një pellg gjaku. Dëshmitarë okularë thanë se viktima u qëllua nga dy persona që ndodheshin në një motoçikletë tjetër. Pas krismave, në vendngjarje mbërritën edhe familjarët e viktimës, të cilët bashkë me shokun e 20-vjeçarit, u morën nga policia për t‘u pyetur lidhur me pistat e mundshme të shkaqeve të vrasjes. Sipas policisë së Athinës, për këtë vrasje po hetohet në disa pista. Mësohet se Zoto nuk kishte dosje apo precedentë të mëparshëm penalë në Greqi.