Bogdani, më i mirë se Tristan

Pas golit të shënuar të dielën kundër Juventusit, mediat italiane e kanë kthyer vëmendjen nga Erjon Bogdanin. Prej shumë javësh sulmuesi shqiptar ka qëndruar në stol, si zëvendësues i spanjollit Diego Tristan, por dyshimet rreth zgjedhjes së trajnerit Kamolese kanë filluar. "Livorno ka humbur dy gola të sigurt dhe rrjeta e shënuar në minutat e fundit nga Bogdani rezultoi e pavlerë. Një shënim për Kamolesen: shqiptari është dhjetë herë më i mirë se Tristan", ishte komenti i mediave italiane, të cilat vazhdonin "është e çuditshme që trajneri vazhdon të preferojë si shok reparti me Tavanon, lojtarin spanjoll". Nga ana e tij, trajneri Kamolese e ka vlerësuar golin e sulmuesit kuqezi: "A është më i mirë Bogdani se Tristan? Kam nevojë për të gjithë dhe duhet të zgjedh lojtarët që janë më shumë në formë. Bogdani luajti mirë, e kërkonte prej kohësh këtë rrjetë. Mendoj se shqiptari do të jetë ‘një armë më shumë‘ për Livornon në fund të kampionatit, ku objektivi është të mbijetojmë".