Dy peqinas therin dy lushnjarë

Peqinasit bëhen sërish problem për policinë e Lushnjës. Ndërsa në fund të javës së shkuar, një banor i fshatit Karinë të Peqinit ishte viktima e një atentati në territorin e Lushnjës, dje dy vëllezër nga Peqini kanë qenë në rolin e autorëve të një krimi. Policia e Lushnjës njoftoi se dy vëllezër nga Peqini kanë plagosur rëndë dy vëllezër nga fshati Gjyshaj i Lushnjës. Ngjarja ka ndodhur dje në orën 15.45, kur Durim dhe Fiqiri Lleshi kanë shkuar në shtëpinë e motrës së tyre, në fshatin Gjyshaj të Lushnjës dhe aty, pasi janë grindur me vëllezërit e dhëndrit të tyre, i kanë qëlluar këta të fundit me thika. Luan dhe Zylyf Gjyshaj janë viktimat e sulmit me thika, të cilët janë shtruar në gjendje të rëndë në spital. Policia ka arrestuar njërin nga agresorët, Durim Lleshin, ndërsa ka shpallur në kërkim tjetrin.