Kapet në Uruguai, ish-bosi i "Populli"

 

Dashamir Biçaku

Arrestohet në Montevideo me pasaportë dhe shtetësi urguajane, Bashkim Driza, ish-drejtuesi i skemës piramidale "Populli", i dënuar me 16 vite burg për mashtrimin e 300 mijë kreditorëve në shumën e 870 milionë lekëve të reja. Mësohet se 50-vjeçari, qëndronte në Uruguai me shtetësi të këtij vendi dhe me emrin e tij, ndërsa vende të tjera si Kili apo Republika Dominikane, i vizitonte në mënyrë të vazhdueshme. Burimet e policisë thonë se ish-bosi i piramidave shqiptare gjatë kohës që i fshihej drejtësisë, është marrë me biznese të ndryshme, të cilat ende janë në verifikim. Ndërkaq, mësohet se kanë nisur edhe kontrollet e llogarive bankare të tij në vendet ku Driza është strehuar gjatë kohës që ishte në kërkim. Arrestimi i kapos së shoqërisë huamarrëse "Populli", është konfirmuar dje nga Policia e Shtetit. Sipas saj, ish-drejtuesi i shoqërisë piramidale, është arrestuar në banesën e tij në Montevideo, të hënën nga policia uruguaiane. Kjo e fundit dy ditë më parë, mësohet se ka kryer operacionin për arrestimin e Drizës dhe më pas u ka kërkuar të dhëna plotësuese homologëve të tyre të Zyrës së Interpol Tiranës. Sipas burimeve, Bashkim Driza ka rënë në pranga pas më tepër se 8 muajsh ndjekje nga autoritetet policore uruguaiane, të cilat ishin në dijeni se i kërkuari qëndronte në vendin e tyre. Sipas burimeve të policisë shqiptare, ish-bosi i fondacionit "Populli", kishte mundur të merrte nënshtetësi me emrin mbiemrin e tij, në vendin ku fshihej, pa tentuar të ndryshonte asgjë nga identiteti. Një ditë pas arrestimit, Bashkim Drizës në Drejtorinë e Policisë së Montevideos, i është komunikuar një urdhër arresti ndërkombëtar ndaj tij, në bazë të vendimit të dënimit të Gjykatës së Tiranës. Kjo e fundit më 18 qershor 2002, e ka dënuar të kërkuarin në mungesë, duke dhënë 16 vite burg për mashtrim në shuma të mëdha, në bashkëpunim me persona të tjerë. Pas komunikimit të arrestimit, një gjykatë e Montevideos, kryeqytetit të Uruguait, ka urdhëruar masën e sigurisë ndaj tij me "arrest shtëpie" për shqiptarin e prangosur. Driza do të mbahet në këtë masë sigurimi derisa të ekstradohet në Shqipëri.
Lëvizjet
Deri tetë vite më parë, informacionet e policisë shqiptare për Bashkim Drizën, tregonin se ai fshihej në Gjermani, ose në Greqi. Për këtë shkak, zyra e Interpol Tiranës, kishte kryer verifikime thuajse në të gjithë vendet e Evropës, me qëllim për arrestimin e të kërkuarit. Sipas policisë, 50-vjeçari Driza duhet të ketë mbërritur në shtetet e Amerikës Latine, përpara vitit 2003, një vit pas dhënies së vendimit të gjykatës ndaj tij, kur kuptoi se nuk kishte mundësi shpëtimi nga drejtësia. Ai është regjistruar në vendin latin e madje ka mundur të fitojë edhe shtetësinë aty, duke u bërë qytetar i Montevideos. Në kryeqytetin uruguaian, sipas burimeve të policisë ai rezultonte të ishte rezident, ndërsa gjatë kësaj kohe, ai ka lëvizur në mënyrë të vazhdueshme në kryeqytetin e Kilit, Santiago, në Republikën Dominikane, në kryeqytetin e saj Santo-Domingo. Policia konfirmoi se Bashkim Driza ka udhëtuar shpesh në vendet e tjera të Amerikës Latine, si në Brazil, Argjentinë, apo në Paraguai. Gjatë gjithë udhëtimeve të tij të herëpashershme në vendet e Amerikës Latine, Driza ishte mbajtur nën vëzhgim nga Interpoli uruguaian. Këta të fundit, sipas burimeve të policisë, nëpërmjet shërbimeve të ndryshme të tyre, kontrollonin lëvizjet e Drizës pasi ai ndodhej në listën e të kërkuarve ndërkombëtarë. Për herë të fundit ai ka qëndruar në Santiago, kryeqytet i Kilit.

Gjurma e fundit e ish-bosit të fajdeve u zbulua në janar 2007

TIRANE - Në janarin e vitit 2007, policia shqiptare ka rënë në gjurmët e Bashkim Drizës. Gjatë hetimit ndaj dy personave të arrestuar në Tiranë, policia zbuloi letërkëmbimet e tyre përmes postës elektronike me të shumë-kërkuarin Bashkim Driza. Ai mësohet se kishte shkëmbyer letra elektronike të rregullta me një të afërme të tij, që punonte në doganën e kryeqytetit. Gjithçka është zbuluar pas arrestimit të shtetases me iniciale E.S., e cila hetohej për një vepër tjetër penale. Në kuadër të këtij hetimi, policia ushtroi kontrolle në kompjuterin e kësaj punonjëseje të doganës, duke arritur të zbulonte edhe letërkëmbimet e saj me ish-bosin e shoqërisë huamarrëse "Populli". Sipas të dhënave të atëhershme të policisë, ishte e pamundur për shkak të mjeteve, të identifikohej vendndodhja e të kërkuarit, ndërsa në letrat që ai shkruante, jo vetëm që nuk përshkruante asgjë për vendqëndrimin e tij, por edhe përdorte identitet të rremë. Një fakt ky, që bie ndesh me veprimet që ka kryer vetë 50-vjeçari, që kishte hyrë në Uruguai me emrin e tij të vërtetë, madje kishte marrë pasaportë me këtë identitet. Policia shqiptare gjithsesi i dokumentoi letrat, që Bashkim Driza kishte shkëmbyer me të afërmen e tij, e cila punonte në doganën e Tiranës. Pavarësisht se nuk kishte asgjë të konfirmuar plotësisht, agjentët e rendit krijuan një ide rreth vendndodhjes së Bashkim Drizës, e cila në atë kohë mendohet se ishte Australia. 

Vendimi: Mori 870 mln lekë, Driza u dënua me 16 vjet burg

TIRANE - Bashkim Driza, ish-bosi i firmës piramidale "Populli" ka marrë 16 vjet burg nga Gjykata e Tiranës në vitin 2002, pasi është gjetur fajtor për mashtrimin në bashkëpunim të 304240 personave në shumën e 870 milion lekëve të reja. Ortaku i Drizës është 56-vjeçari Adem Çepele, i cili gjithashtu, u hetua dhe gjykua në mungesë, kur iu dha një dënim me 14 vite burg, që ende nuk e ka shlyer, pasi ka mundur t'u fshihet prangave. Ndërkohë prokurori i çështjes kishte kërkuar gjatë pretencës 20 vjet burg për Drizën dhe 15 për Çepelen, ndërsa avokatët pafajësi. Sipas gjykatës procedimi penal në ngarkim të akuzuarve është nisur nga Prokuroria e kryeqytetit më 23 janar 1997, nën akuzën e "vjedhjes me anë të mashtrimit", kryer në bashkëpunim. Veprimet hetimore kanë nxjerrë se dy të pandehurit, duke shfrytëzuar njohjet me njëri-tjetrin, kanë krijuar fondacionin piramidal "Populli", ku president i tij ishte Bashkim Driza. Me anë të kësaj skeme mashtruese ata kanë filluar të grumbullojnë para nga publiku i gjerë, ndërsa shumat që arkëtoheshin nga një person lejoheshin të ishin deri në 30 mijë lekë të reja. Vetëm me urdhër të Drizës mund të pranoheshin shuma më të mëdha. Raporti i shumës së arkëtuar me ato që ktheheshin fillimisht ishte në raportin 1 me 2 dhe më pas në raportin 1 me 3. "Duke vepruar në këtë mënyrë, për periudhën prill 1996 deri në janar 1997 të pandehurit kanë arritur të vjedhin 870 milionë lekë nga 304240 persona të ndryshëm", thuhet në vendimin e gjykatës, ku vazhdohet se ekzistenca e faktit dhe fajësia e dy të akuzuarve provohen nga thëniet e dëshmitarëve, të pyetur para gjykatës, një pjesë të cilëve ish-punonjës të piramidës. Gjithashtu, gjykata ka vlerësuar edhe dokumentet shkresore për të vërtetuar fajësinë e të dy të akuzuarve. "Unë kur fillova punë, kuptova që diçka nuk ecte. Burimet nga vinin paratë Bashkimi nuk i tregonte", ka pohuar një prej dëshmitarëve në proces, ndërsa një tjetër, pohon se dinte që Bashkimi nuk kishte pasuri, pasi e njihte para vitit 1990 dhe kur ai filloi këtë aktivitet, dëshmitari kishte shprehur dyshim për aktivitetin e tij, por ishte tërhequr kur Driza filloi aktivitetin me bankën. Sipas dëshmitarit, kur ishte pyetur Driza për origjinën e parave, ishte përgjigjur shkurt: "I dimë ne". Një tjetër dëshmitar pohon se: "Kur njerëzit më thosshin a ka garanci, unë u thosha pyetni Bashkimin. Ai me thirri dhe më tha: Pse i thoni kështu njerëzve! Unë e di ku i gjej lekët". Gjithashtu, gjykata vlerësoi si prova edhe disa dëshmi të tjera, sipas të cilave Driza hapte fjalë, se ishte i lidhur me fondacione të tjera në botë, kishte hotel në Kaliforni, kishte punuar në Greqi, prandaj kishte lekë gjendje  për shlyerjen e kreditorëve dhe kishte burime financiare jashtë shtetit. Ndërkohë, burimi i vërtetë i parave ishin depozitat e qytetarëve, kurse dy të pandehurit, veçse mashtronin kur flisnin për vendndodhje të ndryshme, si në SHBA apo Greqi të shumave të mëdha së të hollave.         fa.ma.