Konflikti, familjet kërcënonin njëra-tjetrën

Konflikti mes dy familjeve kishte nisur një vit më parë, kur ata kishin debatuar për një çështje pronësie. Ndërsa vrasja e dyfishtë është konsideruar si vrasje me motive hakmarrjeje. Ndoshta gjithçka mund të ishte zgjidhur dhe vrasjet do të ishin parandaluar sikur vendimet e institucioneve të shtetit të ishin më të rrepta. Mes familjeve nga fshati Ças, Komuna e Velipojës kishte një konflikt pronësie prej disa vitesh. Bëhet fjalë për disa metra tokë. Një vit më parë, Rafaeli qëllon me çifte Arjan Zefin duke e plagosur atë. Ngjarja ka ndodhur më 11 dhjetor të 2006-ës. Policia e Shkodrës bëri arrestimin e autorit të plagosjes, ndërkohë që Gjykata e Shkallës së Parë në Shkodër e dënon atë vetëm me gjobë. Ndërsa Rafaeli lëvizte i lirë, konflikti mes palëve ka vazhduar sërish. Disa herë në Drejtorinë e Policisë së Shkodrës janë bërë kallëzime si nga familja Filipi ashtu dhe nga familja Zefi për konfliktin mes tyre, madje të dyja palët lëviznin me armë në brez.