Kosova, qe sot e pavarur
Kosova, shteti më i ri në botë, do të shpallet e pavarur sot, në orën 15:00. Një axhendë e shpërndarë ka zbuluar përfundimisht se shpallja e mëvetësisë do të bëhet pikërisht në ditën e pritur, sot, e diel 17 shkurt. Deri më tani, këtë datë nuk e ka konfirmuar asnjë lider i besueshëm politik, për shkak të shqetësimeve që ndërlidhen me sigurinë, të imazhit që do të dalë nga Kosova atë ditë dhe të ngjarjeve në Serbi.
Kjo axhendë është përgatitur disa ditë më herët, por është shpërndarë vetëm pas disa ngjarjeve të rëndësishme që kaluan - zgjedhjeve në Serbi, inaugurimit të Presidentit serb, Boris Tadiç, dhe mbajtjes së seancës së Këshillit të Sigurimit. Pikërisht pas takimit në Nju Jork të ambasadorëve të vendeve anëtare është konfirmuar se procesi i shpalljes është i pashmangshëm.
Kështu, vendi plotëson një proces të gjatë, fillimisht të krijimit të aspiratave shtetërore, luftës për to dhe realizimin e tyre pas një periudhe të gjatë të negociatave, të cilat do të rezultojnë me një shtet shumetnik, atributet e të cilit dalin pikërisht nga propozimi i Marti Ahtisarit. Duken rrethana të mrekullueshme për natyrën e Ballkanit - moti është i përshtatshëm, trupat e NATO-s gjenden në terren dhe sidomos fjalori politik është tejet i kontrolluar. Trupat e KFOR-it kanë demonstruar prezencën e tyre këto ditë, ndërkohë që janë reklamuar në masë të madhe forcat kosovare të sigurisë.
80 tonë fishekzjarre për festimet
Duke ditur traditën shqiptare dhe ballkanike se gëzimet nuk përjetohen si duhet pa krisma, Këshilli Organizativ i Pavarësisë ka vendosur ta vazhdojë këtë ritual. Nga rreth 1 milion euro që qeveria i ka vënë në dispozicion për t‘i shpenzuar për këtë ditë, Këshilli Organizativ ka vendosur që të ndajë disa për fishekzjarre. Në këtë mënyrë, rreth 80 tonë fishekzjarre janë sjellë nga Bullgaria në Kosovë, ndërkohë që në tërë territorin e vendit përcjelljen e ka bërë policia. Burime qeveritare thanë për "Express" se 80 mijë kilogramë fishekzjarre, përveç kryeqytetit të Kosovës, do të shpërndahen edhe në qytete të tjera të vendit.
"Policia ka bërë përcjelljen e tyre. Ato janë dërguar në vendin e posaçëm dhe do të jenë gati në ditën festive", thanë burimet. Sipas tyre, për sjelljen e kësaj sasie fishekzjarresh, veç kontrollit të zakonshëm në doganë, lejen është dashur ta japë edhe Komisioni i Pavarur për Miniera dhe Minerale (KPMM). Azem Rexhaj, drejtor i këtij komisioni, thotë se KPMM-ja bën licencimin e importit dhe deponimit të tyre. "Kompanitë importuese janë përgjegjëse për shpërndarjen e fishekzjarrëve, e bëjnë shpërndarjen sipas kërkesave të tregut", thotë Rexhaj. Ai sqaron se puna e këtij komisioni është të sigurohet nëse fishekzjarret janë të certifikuara konform standardeve ndërkombëtare. "Po, mund ta konfirmojmë se policia ka bërë përcjelljen e fishekzjarreve nga kufiri deri në vendin e caktuar", tha Veton Elshani, zëdhënës i policisë.
Axhenda
E diela e pavarësisë
10:00
Kryeministri shkon nga qeveria në Parlament dhe dorëzon kërkesën për seancë të jashtëzakonshme të Parlamentit
11:00
Kryeministri publikon kërkesën për një seancë të jashtëzakonshme të Parlamentit
12:00
Mbledhja e Kryesisë së Kuvendit
13:30
Takimi i grupeve parlamentare
15:00
Seanca plenare e Kuvendit të Kosovës
18:00
Deklaratë nga të tre liderët në hotelin "Grand", në Media CENTER
18:30
Paraqitja e obeliskut të pavarësisë përpara Pallatit të Rinisë në Prishtinë
19:00
Koncerti i Filarmonisë së Kosovës në hollin e koncerteve "1 Tetori"
20:00
Koncert në sheshin e qytetit
22:50
Presidenti dhe Kryeministri u drejtohen qytetarëve të Kosovës
23:00
Fishekzjarre të ngritura në katër pjesë të ndryshme të Prishtinës
Kosova nis festën e shtetit të ri
Kosova ka nisur 24 orë përpara festën e lindjes së shtetit të ri. Nëpër rrugët e Prishtinës ka vërshuar mbrëmë një lumë i tërë njerëzish që festonin të hipur në makina, edhe pse temperaturat janë ulur shumë, duke arritur deri në minus 10 gradë. Të ardhur nga të gjitha anët e botës, qytetarët e Kosovës kanë filluar të gëzojnë për pavarësinë që do të shpallet nesër pasdite nga Kuvendi i Kosovës.
Autokolona të pafund makinash kanë bllokuar trafikun e kryeqytetit të Kosovës, duke u rënë borive dhe valëvitur flamujt kombëtarë, të shoqëruar nga flamujt e Shteteve të Bashkuara të Amerikës dhe të Mbretërisë së Bashkuar. Në shëtitoren kryesore të Prishtinës po instalohet një skenë gjigante, nga ku do të këndohet dhe do të mbahen fjalime për lindjen e shtetit më të ri në Evropë. Një numër i madh njerëzish me daulle e të veshur me kostume popullore kanë hyrë në hotelin "Grand" në Prishtinë, ku janë instaluar televizionet botërore, duke kënduar dhe kërcyer, në shenjë demonstrimi të një populli që ka pritur shumë. Ndërkaq, qeveria e Kosovës është mbledhur gjithë natën për të shqyrtuar situatën dhe për të marrë masat e duhura për të mos ndodhur asnjë incident. Mësohet se rrugët e Prishtinës, që e lidhin me qytetet e tjera, do të mbyllen sot për të mos tejmbushur kryeqytetin.
Po ashtu, mësohet se trupa të posaçme të Shërbimit Policor të Kosovës janë shtuar në brezin kufitar me Kosovën, që e lidh me Serbinë, për të parandaluar ndonjë incident. Sipas axhendës së përcaktuar, përveç seancës së Kuvendit, krerët e Kosovës do të dalin në një konferencë shtypi, ku do të bëjnë të ditur piketat e shtetit të ri, ndërkohë dhe do t‘u përgjigjen deklaratave të ministrave serbë që do të vizitojnë Kosovën. Më pas do të mbahet një koncert i madh festiv në nderim të dëshmorëve të Kosovës, ku do të marrin pjesë të gjithë pjesëtarët e familjeve të martirëve të luftës.
Në selinë e Kryeministrisë ishin magazinuar një numër i madh bluzash të bardha me një hartë të kuqe në mes, në të cilën shkruhej "Kosova". Një komision i posaçëm, i organizuar nga Kryeministri, ka përcaktuar detajet e axhendës së sotme, e cila, sipas të gjitha gjasave do të kalojë në pjesën spontane të saj, siç ndodhi dhe mbrëmë. Të gjithë kanë nisur të gëzojnë atë që kanë pritur prej shumë e shumë kohësh. Festë, e cila është shtyrë vazhdimisht, por jo pa fund...