Leskaj: Legalizimet, PS kundër ligjit

Grupi parlamentar i Partisë Socialiste deklarohet kundër projektligjit të fundit për legalizimet. Kryetarja e grupit, Valentina Leskaj, argumentoi pas mbledhjes së djeshme se projekti është një dështim i radhës i qeverisë. Duke e paralelizuar me dështimin që pati projekti fillestar i qeverisë për legalizimin dhe më pas urbanizimin e ndërtimeve dhe zonave informale. Leskaj vuri në dukje edhe shkeljen ligjore sa i takon rritjes së kompetencave të Agjencisë së Legalizimeve përtej asaj çka lejon logjika juridike. Një tjetër temë e diskutuar në grupin parlamentar kishte të bënte me raportin që pritet të kalojë në Kuvend për Entin Rregullator të Telekomunikacioneve. Leskaj këmbënguli se forca e saj politike nuk mbështet asnjë individ konkret, por është në të drejtën e mbrojtjes së institucioneve. Në rastin konkret, socialistët e cilësojnë si jashtë normales shkarkimin e bordit të ERT-së të realizuar pak ditë më parë me vendim të qeverisë "Berisha". Për këto dy çështje, deputetët kanë marrë vendimin që të votojnë kundër projekteve të paraqitura.