Ministrat e "A3"-shit takohen në Pentagon

Ministrat e Mbrojtjes së Shqipërisë, Kroacisë dhe Maqedonisë u takuan dje në Uashington me sekretarin amerikan të Mbrojtjes, Robert Gejts. Të tria vendet ushqejnë shpresa për një ftesë për anëtarësim në NATO në takimin e ardhshëm të Aleancës në prill dhe sinjalet nga Uashingtoni janë shumë të rëndësishme në këto përpjekje. Takimet me zyrtarët e lartë amerikanë, si me zotin Gejts edhe me zëvendëssekretarin e Shtetit, Xhon Negroponte, u zhvilluan me dyer të mbyllura. Ministri Mediu pohoi se takimi me sekretarin Gejts u zhvillua në një frymë shumë pozitive. Mediu kishte marrë nga sekretari Gejts edhe një herë mirënjohjen e Shteteve të Bashkuara për angazhimin e Shqipërisë në Irak dhe Afganistan. Sekretari Gejts i kishte shprehur gjithashtu përkrahjen që i ofrojnë Shtetet e Bashkuara Shqipërisë në ambiciet e saj për anëtarësim në NATO. Dy shefat e ushtrisë diskutuan gjithashtu edhe mbi një numër projektesh që do të administrohen përmes Departamentit të Mbrojtjes dhe që synojnë modernizimin e ushtrisë shqiptare, në kuadër të reformave ushtarake. Po dje paradite, ministri Mediu zhvilloi një takim edhe me zëvendëssekretarin e Shtetit, Xhon Negroponte. Pas takimit, Mediu tha në komentet për "Zërin e Amerikës" se kishte marrë nga Negroponte angazhimin se Shtetet e Bashkuara janë plotësisht në favor të anëtarësimit të Shqipërisë në NATO.

Zëvendëssekretari i Shtetit kishte vlerësuar përparimin e madh të shënuar nga tri vendet aspirante për anëtarësim, duke thënë se përvoja e Kartës së Adriatikut do të zbatohej edhe me vende të tjera që synojnë anëtarësim. Ndërkaq, në kuadër të lindjes së një shteti të ri në Ballkan, me shpalljen e pavarësisë së Kosovës, Negroponte kishte nënvizuar edhe një herë mbështetjen e Shteteve të Bashkuara për këtë shtet, duke thënë se ato janë të angazhuara në përpjekje diplomatike për të inkurajuar edhe vende të tjera ta njohin Kosovën.