SHBA – Trump: Jam i pakënaqur me Putinin, po vret shumë njerëz
UASHINGTON, 8 korrik /ATSH/ – Jam i pakënaqur me presidentin rus, Vladimir Putin për shkak të vazhdimit të luftës në Ukrainë, pasi shumë nga të vrarët janë ushtarë rusë, tha sot presidenti i SHBA-së, Donald Trump në një mbledhje të kabinetit, sipas “Reuters”.
“Po na thuhen shumë budallallëqe prej tij. Putin është shumë i sjellshëm gjatë gjithë kohës, por kjo rezulton të jetë pa kuptim”, tha Trump.
Ai shtoi se po shqyrton vendosjen e sanksioneve ndaj Moskës.
Deklarata e tij vjen një ditë pasi SHBA-ja autorizoi dërgesat e reja të armëve mbrojtëse në Ukrainë.
Ndërkohë, një mbështetje të gjerë po merr në Senat – projektligji “Akt i Sanksioneve ndaj Rusisë 2025”, që parashikon tarifa 500% ndaj naftës, gazit dhe uraniumit rus.
Trump tha se po e sheh me shumë seriozitet këtë projektligj. /Ad.Ab./ /a.i/