SHBA, 3.4 milionë USD për gjyqësorin

Gjyqësori shqiptar do të asistohet me anë të një projekti të madh të mbështetur nga qeveria e Shteteve të Bashkuara, i cili promovon forcimin e pavarësisë së gjykatave dhe luftën ndaj korrupsionit. Nëpërmjet këtij programi, qeveria e shteteve të Bashkuara të Amerikës jep kontributin financiar prej 3.9 milionë USD, në përmirësim të qeverisjes së gjyqësorit dhe rritjes së përgjegjshmërisë në institucionet kryesore të vendit. Dje, Agjencia e Shteteve të Bashkuara për Zhvillim Ndërkombëtar e njohur si USAID-i, nënshkroi një Memorandum Mirëkuptimi me Ministrinë e Drejtësisë, Këshillin e Lartë të Drejtësisë dhe autoritetet e tjera kombëtare gjyqësore, për të përmirësuar cilësinë e drejtësisë në Shqipëri dhe për të fituar besimin e publikut te gjykatat dhe institucionet e tjera publike. Memorandumi i Mirëkuptimit u nënshkrua nga drejtori i misionit të USAID-it në Shqipëri, Eduard T. Landau, ministri i Drejtësisë, Enkelejd Alibeaj, nënkryetari i Këshillit të Lartë të Drejtësisë, Kreshnik Spahiu, kryetari i Gjykatës së Lartë dhe kryetari i Konferencës Gjyqësore Kombëtare, Thimio Kondi dhe drejtoresha ekzekutive e zyrës së administrimit të buxhetit gjyqësor, Luljeta Laze.

Projekti

Projekti do të asistojë në 10 gjykata të vendit të marra si "pilote". Asistenca do të përfshijë futjen e sistemeve të regjistrimit për mbajtjen më të saktë të procesverbaleve gjyqësore, krijimin ose përmirësimin e faqeve të internetit të gjykatave me informacion rreth aktivitetit të gjykatës, botimin e vendimeve gjyqësore në kopje elektronike dhe fizike, përmirësimin e sistemit të arkivave gjyqësore, standardeve dhe procedurave që kanë lidhje me to, zbatimin e një strategjie për përfshirjen e publikut, vendosjen e standardeve dhe strukturave për t‘iu përgjigjur kërkesave të publikut e të mediave, vendosjen e standardeve të punës për gjykatat, shkurtimin e vonesave gjatë gjykimit dhe sistemet për hedhjen e shortit, zgjerimin e aksesit të gjyqtarëve në aktet ligjore dhe rregulloret nëpërmjet përdorimit të bazave të të dhënave etj.

Ambasadori

Në fjalën e mbajtur në takimin e djeshëm, ambasadori i Shteteve të Bashkuara në Tiranë, Xhon Uidhers II, deklaroi se "besimi në gjykata është i domosdoshëm për shtetin ligjor. Qytetarët duhet të besojnë që kur ata i çojnë mosmarrëveshjet e tyre para gjykatave, do të trajtohen si të barabartë dhe me drejtësi. Ata duhet ta ndiejnë se gjykatat do të gjykojnë rastin e tyre me paanshmëri, bazuar në prova dhe ligj. Perceptimi se vendimet e gjykatave nuk merren, duke u bazuar në fakte dhe ligj, por duke iu nënshtruar ndikimit ose interesave të caktuara, çon në thërrmimin e besimit të publikut. I çon qytetarët drejt gjetjes së mënyrave të tjera alternative jashtë gjykatave për të zgjidhur mosmarrëveshjet". Duke folur për përpjekjet e përbashkëta mes mazhorancës dhe opozitës për reformën në drejtësi, kryediplomati amerikan në Tiranë theksoi se: "Ndërsa përparon drejt një konsensusi politik në javët dhe muajt e ardhshëm - dhe ne shpresojmë se kjo do të ndodhë - nuk është e nevojshme që të qëndrojmë pa lëvizur dhe të presim për të ndërmarrë veprim në gjykata. Hapa konkretë për të përmirësuar gjykatat mund të fillojnë që tani".