Xhani "bllokon" Enco Malindin

Presidenti i Partizanit, Albert Xhani, nuk do të lejojë largimin e sulmuesit të kombëtares Shpresa, Enco Malindi. Futbollisti vazhdon të jetë në provë te Slavia e Sofjes, ndërkohë që drejtuesit e klubit bullgar e kanë pëlqyer lojën e tij, duke kërkuar që ta mbajnë në skuadër. Presidenti i klubit, Venislav Stefanov, ka pohuar se ka mbetur i kënaqur nga loja e shqiptarit dhe se klubi i tij do të vazhdonte bisedimet me numrin 1 të Partizanit, për të gjetur akordin e transferimit. Megjithatë, Xhani ka prerë shkurt çdo tentativë për të biseduar, duke deklaruar se nuk do të lejojë largimin e Malindit. "Malindi është lojtar i Partizanit dhe i tillë do të mbetet", tha presidenti i të kuqve. "Ai nuk do të largohet tek asnjë skuadër tjetër, pasi i nevojitet klubit të tij. Nuk kam ndërmend t‘ia jap letrat edhe sikur të më paguajnë 200 mijë euro".

Momentalisht, Partizani renditet në vendin e dytë në Kategorinë Superiore dhe Malindi ka qenë një alternativë mjaft e vlefshme për trajnerin Hasan Lika për repartin sulmues. Megjithatë, kjo nuk duket se është ngërçi kryesor, pasi shkak i "konfliktit" është bërë shuma e ofruar për kartonin e lojtarit. Marrëveshja është prishur që në fillimet e provës që Malindi ka zhvilluar me ekipin bullgar, që vazhdon fazën përgatitore në Antalia të Turqisë. Slavia ofronte vetëm 50 mijë euro për kartonin e sulmuesit dhe mundësinë për të kaluar para në arkat e Partizanit nëse në të ardhmen do ta shiste lojtarin. Ndërsa presidenti Xhani pretendonte 250 mijë euro dhe është shprehur se nuk kishte ndërmend ta ulte kërkesën.