“Çifti Martin”’ ia mësynë Tiranës

Produksioni i Teatrit Kombëtar të Kosovës, shfaqja “Çifti Martin”, me regji të Bekim Lumit, të premten (sot) udhëton drejt Shqipërisë. Të shtunën mbrëma ajo inskenohet në Teatrin Kombëtar të Tiranës. Nga Express më 11 shkurt 2011 në ora 11:35

Shfaqja e kësaj shfaqjeje në Tiranë është pjesë e vazhdimësisë së bashkëpunimit ndërmjet dy teatrove kombëtare.

“Çifti Martin” është një krijim artistik eksperimental, i ndërtuar në një skenë të vetme (me një tekst prej tri faqesh) të antikomedisë “Këngëtarja Tullace”, të Eugene Ionesco’s. Shfaqja është sajuar në formë të një parodie mbi motivin e ‘rinjohjes’ burrë-grua.

Në shfaqje luajnë aktorët Astrit Kabashi dhe Gresa Pallaska, dhe ajo është realizuar në nëntor të vitit 2008, dhe prej atëherë vazhdon të jetë pjesë e repertorit të Teatrit Kombëtar të Kosovës.

Ndryshe, “Çifti Martin’ në vitet 2009 dhe 2010 e ka përfaqësuar Kosovën në disa festivale teatrore ndërkombëtare, si Festivali Ndërkombëtar Teatror ‘Incontri Teatrali’, në Lugano (Zvicër); Festivali Teatror Kamertal ‘Risto Shishkov’, në Strumicë (Maqedoni); Festivali Ndërkombëtar i Teatrit në Prishtinë; dhe Festivali i Teatrit Kontemporan Europian ‘Euro-Scene’, në Leipzig (Gjermani).

Gjatë këtij viti, shfaqja pritet të paraqitet edhe në disa festivale tjera ndërkombëtare.