Arrestohet serbi i akuzuar për krime lufte

Është arrestuar në Francë një pjesëtar i njësitit paramilitar serb, i cili e kishte filmuar ekzekutimin e boshnjakëve afër Srebrenicës në vitin 1995.

Prokuroria për krime të luftës në Beograd tha se 47 vjeçari Miodrag Momiç është arrestuar në Grenobël, ku fshihej me identitet falso.

Pjesëtari i njësitit "Skorpionët" kërkohej nga Serbia, ndërsa Interpoli kishte lëshuar fletëarrest ndërkombëtar për krime lufte në Bosnje në vitin 1995.

Videoja e ekzekutimit u shfaq në vitin 2005 gjatë gjykimit të ish presidentit serb Sllobodan Millosheviç në Tribunalin e Hagës.

Katër anëtarët e tjerë të njësitit u dënuan në vitin 2007 në Beograd me 13 deri 20 vjet burg.