Berisha: Jemi ndër 10 vendet më të mira të Europë

Ekonomia shqiptare është afër performancës së dhjetë vendeve më të rëndësishme të Bashkimit Europian. Ky ishte lajmi që dha dje Kryeministri Berisha në mbledhjen e qeverisë teksa citoi një raport të publikuar nga Drejtoria e Përgjithshme e çështjeve të Ekonomisë dhe Financave në Bashkimin Europian për vendet e rajonit. “Shqipëria ka bërë një progres të rëndësishëm dhe ka arritur shumë afër performancës së dhjetëshes së Bashkimit Europian. Këto arritje janë frytet e një kursi të thellë reformash, të cilat, të vlerësuara në raport me lirinë ekonomike, nxjerin përfundimin se Shqipëria është e para”, deklaroi Berisha në mbledhjen e qeverisë. Duke e konsideruar këtë si vlerësimin më maksimal që vendi ka marrë tërë historinë e tij, për ekonominë, Kryeministri Berisha u ndal më në detaje në gjetjet dhe vlerësimet e Raportit të Komisionit Europian, duke analizuar edhe faktorët kryesorë që e bëjnë ekonominë shqiptare solide. Sipas tij, raporti thekson se kjo rritje ka ardhur si pasojë e investimeve të mëdha. Berisha duke cituar raportin theksoi se vetëm Shqipëria dhe Mali i Zi në kohën e krizës globale mbetën tërheqëse për investimet e huaja. Po kështu vuri në dukje Kryeministri, ky raport e konsideron Shqipërinë si një nga vendet me politika monetare fleksibël. Po kështu, Berisha theksoi se të ardhurat buxhetore u rritën në mënyrë të ndjeshme në Shqipëri dhe Malin e Zi dhe se kjo ishte arsyja që qeveria po arrin të rrisë rrogat dhe pensionet edhe për këtë vit. Prezantimin e këtij raporti më të dhëna të kënaqshme për ekonominë shqiptare kreu i qeverisë e përdori dje edhe për të përgënjeshtruar akuzat e hedhura nga kundërshtarët politikë, sipas të cilave Shqipëria po përjeton një krizë ekonomike. “Siç e shihni, zotërinj ministra dhe të nderuar qytetarë, ky raport i jep përgjigjen më të shkëlqyer atyre që ndjellin nga mëngjesi gjer në darkë, krizë dhe zi. Ky raport është përgënjeshtrimi i gjallë ndaj sagës së mashtrimit dhe imagjinatave për ata që ndjellin krizë”, deklaroi Berisha. Nga ana tjetër, gjatë fjalës së tij për raportin e KE-së, kreu i qeverisë ironizoi përfaqësuesit e PS-së me qëndrueshmërinë e lekut shqiptar, duke theksuar se ky lek nuk ishte i njëjtë me atë që u shpërnda përpara Kryeministrisë gjatë kohës së grevës së urisë. Po kështu, Kryeministri Berisha e krahasoi lirinë ekonomike në vend edhe me zgjedhjet e lira që u zhvilluan në qershorin e kaluar në vend.