Berlusconi largohet në vitin 2013

Kryeministri italian, Silvio Berlusconi, ka konfirmuar se nuk do të rikandidojë më pas përfundimit të mandatit të tanishëm, në vitin 2013.

Ai tha se synon të kompletojë planin e tij për ndryshimin e sistemit gjyqësor të Italisë, dhe të ndryshojë kushtetutën e vendit para largimit.

Deri me tani, Berlusconi i ka mbijetuar skandaleve dhe gjykimeve të shumta.

Të mërkurën, Dhoma e Ulët e parlamentit aprovoi një ligj, i cili do të shkurtojë kohëzgjatjen e disa gjyqeve. Dhoma e deputetëve në Romë miratoi një projektligj, i cili mund ta ndihmojë Berlusconin në proceset që po zhvillohen kundër tij.

Rregullat e reja parashikojnë që proceset ndaj personave që nuk janë dënuar më parë të vjetrohen më shpejtë. Projektligji duhet të miratohet edhe në Senat.

Opozita e majtë e ka kundërshtuar atë me vendosmëri.

Ndërsa mbështetësit e Berlusconit e mbrojnë atë si masë për të lehtësuar proceset në organet e ngarkuara juridike të Italisë.