Brenda javës shpallen rezultatet e Letërsisë

Vlerësimet e provimit të parë të detyruar të Maturës Shtetërore pritet të dalin këtë fundjavë. Sipas Agjencisë së Vlerësimit të Arritjeve të Nxënësve (AVA) bëhet me dije se në procesin e vlerësimit të provimeve të maturantëve për lëndën e Letërsisë janë angazhuar gjithsej 155 mësues të shkollave të mesme. Ata janë grumbulluar në katër qendra vlerësimi, tri prej të cilave në rrethe. Sipas AVA-s, kjo është dhe risia për këtë vit, që tri qendra janë vendosur jashtë Tiranës, ndërsa, qendra e vlerësimit në Tiranë është përqendruar në shkollën "Sabaudin Gabrani", nën masa tejet të rrepta të sigurisë. Kjo është edhe qendra kryesore e vlerësimit të testeve. Por ashtu si në Agjencinë e Vlerësimit të Arritjeve të Nxënësve, edhe në qendrat ku vlerësohen provimet, forcat blu nuk largohen për asnjë minutë. Gjithashtu, çdo mësues e ka të përcaktuar numrin e testeve që do të vlerësojë. Këtë vit korrigjuesit e provimeve janë ndarë në dy dhoma të ndryshme dhe pasi një grup mbaron korrigjimin e testeve, menjëherë këto teste kalojnë dhe një herë për t’u rikorrigjuar nga grupi tjetër i korrigjuesve. Në rastet kur nga vlerësimi i parë në të dytin vihet re një diferencë pikësh, atëherë situatën e merr nën kontroll një komision i vogël ose grupi përgjegjës, që gjendet në çdo qendër. Atëherë, ky grup ribën vlerësimin final të testit dhe përcakton në mënyrë përfundimtare notën për këtë provim.