Fullani: Bankat tona nuk rrezikojnë falimentimin
TIRANE- Shqipëria nuk është e rrezikuar nga kriza financiare që pas Shteteve të Bashkuara të Amerikës ka përfshirë edhe Evropën, Guvernatori i Bankës së Shqipërisë Ardian Fullani, në një konferencë për shtyp ka garantuar se paratë e shqiptarëve të depozituara në banka janë të sigurta.
Në fjalën e tij Fullani tha se, “Shqipëria nuk është vend i intoksikuar dhe sistemi bankar shqiptar nuk ka asnjë krahasim me vendet e tjera të cilët kanë banka dhe institucione financiare me humbje të mëdha.”
Guvernatori ka deklaruar se edhe në rastin e rëndimit apo të shtrirjes në kohë të krizës financiare, pasojat në vendin tonë nuk do te ndihen tek depozitat, por në treguesit e tjerë të ekonomisë si eksportet dhe investimet.
“Një krizë e zgjatur dhe e rënduar nëse do të vazhdojë në ekonominë globale do ti ketë kryesisht efektet e saj në eksportet tona si dhe investimeve direkte, por duke pasur parasysh përdorimin e të ardhurave nga emigracioni kryesisht për importet mendoj se kjo do të jetë një mbështetje e mirë për të mos pasur një ndikim të fortë”, tha Fullani.
Kreu i Bankës së Shqipërisë ka shtuar se do të rritet vigjilenca në monitorimin e situatës. Në këtë kuadër institucioni mbikëqyrës bankar u ka kërkuar bankave të nivelit të dytë që të nxjerrin rezultate pozitive në bilancet e tyre. (a.r/news24/balkanweb)