Futbolli, viktimë e famës së tij

Presidenti i FIFA-s, Sepp Blatter ka thënë se futbolli është bërë viktimë e famës së tij pas serisë së skandaleve për kurdisje të ndeshjeve që goditën sportin vitin e fundit.

“Ky nuk është një fenomen regjional. Kjo duhet të marrë fund”, tha Blatter gjatë asamblesë së përgjithshme të Konfederatës afrikane të Futbollit. “Ne do të bisedojmë rreth kësaj çështjeje në Kongresin e FIFA-s. Futbolli është bërë viktimë e famës së tij”, theksoi ai.

Blatter po ashtu njoftoi se organizata ndërkombëtare policore Interpol do të jetë pjesëmarrëse në kongresin e ardhshëm të FIFA-s, në maj, që mbahet në Budapest të Hungarisë.

Më herët gjatë javës, Federata e Futbollit e Afrikës së Jugut bindi FIFA-n t’u japë prioritet hetimeve për dyshimet rreth kurdisjeve të ndeshjeve ndërkombëtare, para Kampionatit botëror 2010.

Reputacioni i Afrikës është dëmtuar rëndë, pas skandalit në shtetin fqinj, Zimbabve, ku më tepër se 80 futbollistë u suspenduan, pas dyshimeve për përfshirje në kurdisjen e ndeshjeve.