Gjykatë; Vrau bashkëshortin muaj më parë, pranon krimin

Vrau bashkëshortin, pasi nuk i duronte dot keqtrajtimet e tij, 28-vjeçarja Vitore Suçi ka pranuar dje autorësinë e krimit. “E vrava në kushte të tronditjes së fortë psikike, kërkoj të gjykohem me gjykim të shkurtuar”, - ka deklaruar dje përpara gjykatës e pandehura. Pas kërkesës së bërë nga ana e saj, gjykatësja e çështjes, Shefkije Demiraj, ka shtyrë procesin për një datë tjetër, në mënyrë të tillë që prokuroria të përgatisë edhe konkluzionet e saj përfundimtare. Gjatë procesit të djeshëm gjyqësor kanë marrë pjesë edhe përfaqësuesit e Ambasadës Amerikane, të cilët kanë ndjekur seancën. Po të njëjtin deklarim, Vitore Suçi e ka bërë edhe gjatë seancës së masës së sigurisë në gjykatë, duke rrëfyer me detaje çfarë e detyroi të qëllonte ndaj të shoqit. Ngjarja për të cilën akuzohet e pandehura ka ndodhur më 28 gusht të vitit kaluar. Nga hetimet ka rezultuar se 28-vjeçarja kishte vetëm 3 javë që ishte martuar me viktimën Marash Doda, 40 vjeç. Ditën e ngjarjes, Suçi kishte vendosur që të ikte nga shtëpia. Ajo do të kthehej tek prindërit e saj në Paskuqan dhe donte të ndahej nga 40-vjeçari Mirash Doda. Por ky i fundit nuk e ka pranuar këtë gjë. Në këto kushte, vajza 28-vjeçare ka thirrur prindërit e saj që të shkonin në shtëpinë tek Bregu i Lumit dhe ta merrnin. Kur ata kanë shkuar atje, rreth orës 14:00, është rindezur edhe një herë konflikti mes Mirashit dhe Vitores. Në një moment, gruaja ka tentuar që të ikë, por kur 40-vjeçari e ka ndaluar, ajo ka marrë thikën e bukës dhe e ka qëlluar në zemër bashkëshortin e saj. Nga hetimet e kryera nga grupi hetimor ka rezultuar se motivi kryesor i kësaj ngjarjeje të rëndë midis autores dhe viktimës, dyshohet të kenë qenë kushtet e vështira ekonomike dhe xhelozia e bashkëshortit të saj.

“Masakra e Cërrikut”

Të pandehurit dhe avokatët braktisin sallën e gjyqit

Prej disa seancash vazhdon të shtyhet, për motive nga më të ndryshmet, të inskenuara prej avokatëve në bashkëpunim me klientët e tyre, gjyqi në ngarkim të tyre. Të pandehurit e akuzuar për masakrën e Cërrikut në vitin 1997 kanë braktisur dje sallën e gjyqit sapo ka nisur të dëshmonte i penduari Bujar Buzani. Shkak për braktisjen e kafazit dhe më pas sallës së gjyqit ka qenë moslejimi i tyre për të kundërshtuar pa radhë çdo deklaratë që jepte Buzani në lidhje me ngjarjen. Avokatët mbrojtës kanë pretenduar se klientët e tyre janë dhunuar nga efektivat e burgjeve, gjatë uljes së tyre në karrige sa herë që kundërshtonin të penduarin. Nga ana tjetër, mbrojtësit i kanë kërkuar gjykatës që mjekja e burgut të përcaktonte arsyet përse nuk mund të paraqitej në seancë një prej të pandehurve, i cili mësohet të ketë qenë i sëmurë. Pas largimit të të pandehurve dhe mbrojtësve nga seanca, gjykata ka vendosur ta shtyjë sërish procesin gjyqësor. Të pandehurit akuzohen për ngjarjen e 23 majit të vitit 1997, ku humbën jetën gjashtë gardistë, Sali Martini, Besnik Syla, Halit Haxhia, Qemal Mehmeti, Bashkim Mella. Të pandehurit e këtij procesi Llazar Bicja, Met Bozi, Arjan Toska, Roland Xhepaxhiu, Alban Toska, Skënder Cani, Tomorr Buzani, Bujar Buzani dhe Entel Gashi po gjykohen për akuzat e “vrasjes në rrethana të tjera cilësuese më shumë se një herë” dhe “vrasjes në rrethana cilësuese më shumë se një herë, të mbetur në tentativë”.