Harrohet grabitësi, hetohet i grabituri (VIDEO)

Duket se problemet e pronarit të argjendarisë të grabitur në qendër të qytetit të Fierit të enjten e javës së kaluar, Ilija Kabucit, nuk kanë të sosur. Pasi përjetoi çastet e tmerrit kur tyta e kallashit iu drejtuara në fytyrë dhe iu grabitën 2 kilogramë flori me vlerë rreth 80 mijë dollarë, tashmë i është kundërvënë edhe policia, e cila ka nisur një procedim penal ndaj tij, ndonëse ende nuk ka asnjë të dhënë lidhur me identitetin e autorëve të grabitjes, raporton Shqip.

Mësohet se ai po hetohet për konsumim të veprës penale të tregimit të sekretit shtetëror nga shtetasit, parashikuar nga neni 295/2, pasi video e grabitjes u publikua në media.

Më tej, policia njofton zyrtarisht se është kryer edhe sekuestrimi i serverit të regjistrimit të filmimeve të kamerave në ambientet e brendshme të argjendarisë.

Prokuroria thotë se dosja nuk ka ardhur akoma nga prokuroria, por hedh dyshimet nëse policia po vepron drejt. Sipas organit të akuzës, nëse sekuestrimi i pamjeve të grabitjes nga policia është kryer pas publikimit në media, atëherë 58-vjeçari Kabuci nuk mund të ngarkohet me përgjegjësi penale. Sipas prokurorisë, Kabuci duhej njoftuar që materialet filmike, që janë në pronësi të tij, janë sekret hetimor.