Harrohet marrëveshja

Kryeministri Hashim Thaçi nuk e ka në plan aktualisht t’ia ndajë edhe një Ministri në Qeverinë e Kosovës, Behgjet Pacollit. Por, në AKR ende deklarojnë se do ta marrin hisen e tyre. Mimoza Kusari – Lila thotë se për zbatimin e marrëveshjes do të diskutojnë shpejt dy nënshkruesit e saj - Thaçi dhe Pacolli.

As këtë muaj nuk pritet që Kryeministri Hashim Thaçi të zëvendësojë ndonjë ministër të partisë së tij me zyrtarë të AKR’së për të zbatuar marrëveshjen për ndarjen e pushtetit me Behgjet Pacollin.

Megjithëse fundi i muajit shtator ka qenë afati i fundit për Pacollin që Thaçi të zbatojë marrëveshjen, tash s`dihet se kur është afati tjetër për të zbatuar në tërësi marrëveshjen PDK-AKR.

Zëvendësja e Kryeministrit Thaçi në Qeveri dhe zëvendësja e Pacollit në Parti, Mimoza Kusari – Lila ka thënë se AKR’ja është duke pritur zbatimin e marrëveshjes nga ana e Hashim Thaçit.

Sipas saj, AKR’ja është duke pritur që finalizimi i marrëveshjes për koalicion të bëhet nga dy liderët e partive – Hashim Thaçi dhe Behgjet Pacolli.

“Asgjë të re nuk ka sa i përket zbatimit të marrëveshjes, por ne presim që ministria për AKR’në të ndahet ashtu siç janë marrë vesh dy liderët e partive”, ka thënë Kusari – Lila për Express, të shtunën.

Ajo nuk ka dashur të komentojë deklaratat e homologut të saj në Qeveri, Hajredin Kuçi, i cili po vazhdon të deklarohet se nuk e di nëse PDK’ja duhet t`ia jap edhe një Ministri AKR’së.

“Marrëveshja është arritur mes dy liderëve dhe ata janë përgjegjës për hapat e mëtutjeshëm”, ka thënë Kusari – Lila.

Para një muaji, edhe Pacolli kishte deklaruar se i beson Hashim Thaçit, se AKR’së do t`i ndahet edhe një ministri.

“Unë jam i bindur kështu se shumë shpejt do realizohet marrëveshja në mes dy partnerëve të koalicionit”, pati thënë Pacolli.

Sipas Pacollit, Thaçi kishte premtuar pesë ministri për AKR’në dhe partitë e tjera të Koalicionit Kosova e Re kur u morën vesh për ndarjen e pushtetit, në fillim të këtij viti.

Por, kanë kaluar më tepër se tetë muaj që partneri i vogël në koalicion po pret realizimin e marrëveshjes me Hashim Thaçin.

Aktualisht AKR’ja me Koalicionin për Kosovën e Re ka katër ministri.

Kryeministri Hashim Thaçi dhe zëvendësi i tij në Qeveri dhe në parti, Hajredin Kuçi, nuk dëshirojnë të flasin kur pyeten për ndarjen edhe të një dikasteri qeveritar për partnerin e vogël në koalicion.

Nënshkrimi i marrëveshjes për ndarjen e pushtetit mes Thaçit dhe Pacollit është bërë në shkurt të këtij viti dhe aty janë paraparë t’i ndahen AKR’së posti i Presidentit, plus një post zëvendëskryeministri, tri poste ministrore dhe tre zëvendësministra.

Pas vendimit të Gjykatës Kushtetuese që detyroi Liderin e AKR’së të lërë postin e Shefit të Shtetit, Pacolli pati thënë se do të vazhdojë koalicionin me PDK’në, me kusht që të marrë plus edhe një post zëvendëskryeministri, dy poste ministrore dhe tre zëvendësministra.