Hodhën në det 44 klandestinë, 31.6 vjet burg për 11 të pandehurit

Gjykata e Krimeve të Rënda shpalli fajtorë të pandehurit e grupit kriminal, që akuzohet se hodhi në det 44 klandestinë, që po tentonin nisjen me gomone për në Itali një vit më parë. Pasi është dëgjuar mbrojtja edhe për një nga 11 të pandehurit, gjykata u tërhoq për vendim dhe dënoi me 31.6 vjet burg dhe 28 milionë lekë gjobë të pandehurit, të akuzuar për veprën penale të “trafikut klandestin” në bashkëpunim. Njëri nga të pandehurit, Pjetër Fusha akuzohej për “moskallëzim krimi” dhe dje i është shuar masa e sigurisë nga gjykata. Gjatë shpalljes së vendimit, të pandehurit u dënuan me nga 4.8 vjet burg dhe nga 4 milionë lekë gjobë për të pandehurit Ardian Çorri e Gëzim Tafai; me nga 3.4 vjet burg dhe nga 4 milionë lekë gjobë për të pandehurit Aleksandër Malaj, Lek Frroku e Altin Gjeloshaj; 4 vjet burg dhe 4 milionë lekë gjobë dha gjykata për të pandehurin Dilaver Hajdini, 3.8 vjet burg e 4 milionë lekë gjobë për të pandehurin Ardian Gjeloshaj dhe nga 2 vjet burg për të pandehurit Rexhep Cuku dhe Ndrek Preçi. Gjatë paraqitjes së konkluzioneve përfundimtare, prokurori i çështjes kërkoi dënimin me rreth 57 vjet burg për 11 të pandehurit, si dhe 40 milionë lekë gjobë për 6 nga të pandehurit. Masat e dënimit varionin nga 7.4 vjet burg për 6 nga të pandehurit, 3.4 vjet burg për 4 të pandehur dhe 4 muaj burg për të pandehurin Pjetër Fusha, i cili u akuza vetëm për “moskallëzim krimi”. Grupi i të pandehurve u gjykua përmes aplikimit të gjykimit të shkurtuar, nga ku përfitojnë uljen e 1/3 së dënimit.

Trafiku

Sipas akuzës, të pandehurit kanë kryer trafik klandestinësh nga Shqipëria drejt Italisë në rrugë tokësore, duke bashkëpunuar me persona që vepronin në disa vende ballkanike në veri të Shqipërisë. Episodi më i rëndë i trafikimit për të cilin akuzohet grupi prej 11 personash, është ai i 10 janarit 2008, kur drejtuesit e gomoneve që po niseshin për në Itali, kuptuan se ishin zbuluar nga policia dhe për të shpëtuar, hodhën në det të hapur 44 klandestinë, nga të cilët 35 u shpëtuan falë ndërhyrjes së mjeteve të policisë shqiptare. Prokuroria e Krimeve të Rënda përfundoi hetimet dhe dërgoi në gjykatë dosjen me 11 persona të akuzuar, se në bashkëpunim me njëri-tjetrin kanë trafikuar klandestinë nga Shqipëria në Itali, në rrugë detare dhe tokësore. Sipas hetimeve, grupi drejtohej nga të dyshuarit Ardian Corri dhe Gëzim Tafaj, të cilët fillimisht trafikonin klandestinë drejt Italisë në rrugë tokësore nga Mali i Zi dhe Sllovenia për në qytetin italian të Udines. Por, pas zbulimit dhe goditjes së kësaj linje nga policia italiane, grupi kriminal akuzohet nga prokuroria se ka ndryshuar linjën e trafikut, duke u përqendruar në rrugët detare. Krerët e grupit kanë bashkëpunuar me 9 persona, të cilët gjetën 44 klandestinë, i grumbulluan ata te "Zogu i Zi" në Tiranë e më pas me makinat e tyre i transportuan drejt plazhit të Patokut, ku ishte organizuar të bëhej nisja e skafeve, mbrëmjen e vonë të 10 janarit 2008. Hetimet zbuluan se çdo person që donte të shkonte në Itali me gomonet e siguruara nga grupi kriminal ka paguar 390 euro.

Të pandehurit dhe dënimet

Ardian Corri, 4.8 vjet burg e 4 milionë gjobë

Gëzim Tafaj, 4.8 vjet burg e 4 milionë gjobë

Rexhep Cuku, 2 vjet burg

Aleksandër Malaj, 3.4 vjet burg e 4 milionë gjobë

Dilaver Hajdini, 4 vjet burg e 4 milionë gjobë

Altin Gjeloshaj, 3.4 vjet burg e 4 milionë gjobë

Ardian Marku, 3.8 vjet burg e 4 milionë gjobë

Lek Frroku, 3.4 vjet burg e 4 milionë gjobë

Ndrek Preçi, 2 vjet burg

Pjetër Fusha, shuhet masa e sigurimit