Interi në krizë, kërkohet zgjidhja
Dështim! I tillë është mendimi i tifozëve të Interit pas paraqitjes dëshpëruese të ekipit në humbjen 4-0 nga Roma të dielën në Olimpico. Në fakt, dukej se skuadra e Claudio Ranierit as nuk kishte dalë në fushë. Giallorossët e udhëhequr nga Luis Enrique luanin me shpejtësi për dallim nga Nerazzurrët që duken skuadër krejt tjetër nga ajo që me Jose Mourinhon fitoi të gjithë titujt e mundshëm.
Por, Interi i së dielës ishte më i ndryshëm edhe pse skuadra që më herët kishte fituar shtatë ndeshje me radhë. Në gjendjen aktuale, çdo tifoz i Interit ka arsye për të qenë i brengosur. Kush i ka shikuar ndeshjet e fundit me Leccen, Palermon dhe së fundmi Romën, e di për çka është fjala.
Skuadra që luajti ne Romë është ajo që ka pranuar 11 gola në katër ndeshjet e fundit, gjatë së cilave ka humbur tri herë dhe barazuar një (4-4 me Palermon). Kjo me Romën ishte disfata e tetë për Interin pas 22 xhirosh në Serie A. Duhet të kthehemi më 1998/99 për të gjetur një vit të ngjashëm si ky me plot dëshpërime. Tetë humbje, i njëjti numër i disfatave në gjithë sezonin e kaluar.
Mbrojtja e dridhur
Ranieri ka provuar: ka ndërruar modulin shumë herë, ndoshta më tepër se në gjithë karrierën e mëparshme, e zgjidhja e problemit ende mbetet enigmë. Moduli me dy sulmues dukej ai që shërbente më së tepërmi garanci: inkuadrimi i Wesley Sneijderit nuk është se kontribuoi shumë në lojën e ekipit.
Por, mbajtja jashtë e holandezit krijon polemika, por ai më nuk është problemi i Nerazzurrëve. Tani është shëruar plotësisht. Problemi i Interit nuk duket të jetë sulmi, por mbrojtja: nga Julio Cesar e tutje të gjithë mbajnë duart në kokë.
Vija mbrojtëse, me një Samuel i cili sërish ‘çalon’ në tentimet për të zënë në pozitë jashtë loje sulmuesit kundërshtarë, ka qenë një gabim i shpeshtë në ndeshjet e fundit e që u dënua më së miri nga sulmuesi i Palermos, Fabrizio Miccoli i cili realizoi het-trik.
Mungon adrenalina
Shkakun e rënies janë duke e hetuar në detaje stafi teknik i Interit. Ranieri ka folur për mungesë të “adrenalinës”. Përfundimi i një epoke është gjithmonë i vështirë për t’u përballuar ekipi i ‘Tripletës’, që fitoi gjithçka që mund të fitohet, duket se ka marrë fund.
Sneijder, nga problemi në zgjidhje
Në kërkim të rrugëdaljes nga situata aktuale, përmendet emri i Wesley Sneijder. Pikërisht holandezi është futbollisti nga i cili tifozët e Interit presin që skuadra të dalë nga kriza. Sneijder në formën e tij më të mirë mund të jetë ai që eliminon problemet e Nerazzurëve, mjafton t’i gjendet një vend në ekip. Tingëllon e lehtë, apo jo Ranieri?