Investimet, Kosova përplas Priftin me homologun serb në Verona

Ftesa e ministrit të Ekonomisë, Tregtisë dhe Energjetikës, Dritan Prifti, drejtuar investitorëve të huaj, për të investuar kapitalin e tyre në shtetin e Kosovës është bërë shkak për një debat mes tij dhe homologut serb. Në Verona të Italisë po zhvillon punimet e Forumi mbi Investimet në Evropën Juglindore (Italy and South Eastern Investment Forum), me pjesëmarrjen e 600 përfaqësuesve të kompanive më të mëdha italiane dhe ministrave të Ekonomisë dhe Tregtisë së vendeve të Evropës Juglindore. Në këtë takim ku ka qenë i pranishëm ministri serb i Ekonomisë dhe ministri Dritan Prifti, ky fundit në fjalën e tij i ka bërë thirrje sipërmarrjes të investojë në shtetin e Kosovës. Kaq ka mjaftuar dhe homologu serb i ministrit Dritan Prifti ka reaguar ashpër, madje më vonë ka braktisur edhe Forumin. Fjalimi i Priftit në të cilin ai citoi “Kosovën shtet”, ka nxitur reagimin e ministrit serb. Fjalimi i ministrit Prifti ka shkaktuar rebelimin e ministrit serb, sipas të cilit, vendi i tij nuk e njeh këtë shtet, prandaj ai nuk mund të përmendet si i tillë. Lajmi është konfirmuar për mediat nga vetë ministri Prifti, sipas të cilit, Kosova tashmë është shtet dhe se një gjë të tillë nuk mund t’ia ndalojë njeri ta thotë.