Kapshticë, policia bllokon 7 klandestinë afganë

Tentuan hyrjen në tokën shqiptare me një maune mallrash me targa turke. Shqipëria tranzit, destinacioni përfundimtar ishte Italia

Duket se Shqipëria po shihet si pozicioni më i mirë dhe i favorshëm gjeografik për grupet klandestine afgane, që synojnë të emigrojnë ilegalisht drejt vendeve të Perëndimit. Bllokohen nga Policia Kufitare 7 klandestinë afganë, të cilët do përdornin vendin tonë si trampolinë drejt Italisë. Ngjarja ka ndodhur dje, kur nga ana e Policisë Kufitare shqiptare të Kapshticës (Devoll) u ndaluan 7 klandestinët afganë, të cilët po tentonin të hynin në Shqipëri me një maune mallrash me targa turke, për të vijuar më pas udhëtimin drejt Italisë. Grupi i klandestinëve afganë, sipas burimeve zyrtare të Policisë Kufitare, u bllokua rreth orës 13:00, gjatë një kontrolli të ushtruar në një maune me targa turke që kishte si destinacion Tiranën. Nga verifikimet e para të Policisë Kufitare rezulton se grupi i shtetasve afganë do kalonte tranzit për në territorin shqiptar, për të udhëtuar më pas në mënyrë klandestine në drejtim të Italisë. Mësohet se drejtuesi i maunes është shoqëruar në polici, e cila po vazhdon hetimet për lidhjet e mundshme të tij me grupin e klandestinëve afganë. Ndërkohë drejtuesi i automjetit është duke u marrë në pyetje, për të zbardhur lidhjet e tij me ndonjë rrjet të mundshëm në Shqipëri, i cili do t’u mundësonte afganëve kalimin drejt Italisë. Hetimi po vazhdon me marrjen në pyetje jo vetëm të shoferit, por edhe të klandestinëve, me qëllim identifikimin e kontaktit të tyre në vendin tonë. Aktualisht, grupi prej 7 klandestinësh është shoqëruar në ambientet e qendrës GOS, stacionit të kufirit pranë Kapshticës, ndërsa ende nuk është vendosur për procedurat që do të ndiqen me ta. Por, ajo që është e sigurt për palën shqiptare lidhur me klandestinët e kapur, është riatdhesimi drejt vendit të origjinës. Kjo është hera e katërt brenda këtij viti, që Policia Kufitare shqiptare kap në Kapshticë grupe me emigrantë klandestinë të huaj, të cilët synojnë që të emigrojnë në mënyrë të paligjshme drejt Italisë.